ქმრის - ლუკა დარასელიას მკვლელობის ბრალდებით დაკავებულ „ტიკტოკერს“, 25 წლის თეკლა გერსამიას ნაფიცმა მსაჯულებმა ერთხმად გამამტყუნებელი ვერდიქტი გამოუტანეს.

ნაფიც მსაჯულთა სასამართლომ პროკურატურის მიერ წარდგენილი მტკიცებულებების საფუძველზე თეკლა გერსამია დამნაშავედ ცნო ოჯახის წევრის მიმართ დამამძიმებელ გარემოებაში ჩადენილ განზრახ მკვლელობაში.

,,ინტერპრესნიუსის" ინფორმაციით, ნაფიცმა მსაჯულებმა გამამტყუნებელი ვერდიქტი პირველ 4 საათში მიიღეს.

რაც შეეხება სასჯელის დანიშვნის სხდომას, თუ როდის გაიმართება ის, ეს მოგვიანებით გახდება ცნობილი. აღნიშნულ სხდომაზე მოსამართლე ნინო ნაჭყებიამ ნაფიც მსაჯულთა მიერ გამოტანილი გამამტყუნებელი ვერდიქტის საფუძველზე თეკლა გერსამიას სასჯელის სახე და ზომა უნდა განუსაზღვროს.

ამ წუთებში, გერსამიას ადვოკატები, ნაფიც მსაჯულთა სასამართლოს მიერ გამოტანილი გამამტყუნებელი ვერდიქტის გაუქმებას ითხოვენ.

თეკლა გერსამია ბრალს არ აღიარებს. დაცვის მხარის ვერსია ლუკა დარასელიას თვითმკვლელობაა, რაც ნაფიცმა მსაჯულებმა არ გაიზიარეს და ახალგაზრდა ქალი ქმრის განზრახ მკვლელობაში დამნაშავედ ცნეს. სასამართლოში ბრალდების მხარის მიერ გამოკვლეულ მტკიცებულებებში გამომძიებლის მიერ მოპოვებული ფარული აუდიო-ვიდეო ჩანაწერიც იყო, სადაც გერსამია პოლიციის თანამშრომელთან ჩადენილ მკვლელობას აღიარებს, რაც მოგვიანებით უკვე ფსიქოლოგიურ ექსპერტთან უარყო. ცნობისთვის, მკვლელობა თბილისში, 22 აგვისტოს მოხდა.თეკლას გერსამიას ბრალდება სისხლის სამართლის კოდექსის 11 პრიმა, 109-ე მუხლის "კ" ქვეპუნქტით წარედგინა, რაც ოჯახის წევრის მიმართ დამამძიმებელ გარემოებაში ჩადენილ განზრახ მკვლელობას გულისხობს.დანაშაული 16-დან 20-წლამდე ან უვადო თავისუფლების აღკვეთას ითვალისწინებს.