უნგრეთის პრემიერ-მინისტრი ვიქტორ ორბანი სერბეთ-უნგრეთის საზღვარზე იმ გაზსადენთან მივიდა, რომელიც, მისი თქმით, დივერსიის სამიზნე იყო.

ორბანთან ერთად შემთხვევის ადგილზე საგარეო საქმეთა მინისტრი პიტერ სიიარტოც იმყოფებოდა.

მედიის ინფორმაციით, უნგრეთის პრემიერმა საზღვარზე საუბრისას უკრაინაც ახსენა.

„როდესაც უკრაინელებმა უკრაინის გავლით რუსული გაზის მიწოდება დაბლოკეს, ჩვენ შევძელით ამ მილსადენის ექსპლუატაციაში გაშვება და მისი გამტარუნარიანობის გაზრდა“, - აღნიშნა ორბანმა.

მისი თქმით, სწორედ ამიტომ, მიუხედავად იმისა, რომ უნგრეთი უკრაინის მხრიდან გაზის ბლოკადის ქვეშ იმყოფება, მაინც შესაძლებელია ქვეყნის გაზით და, შესაბამისად, ენერგიით მომარაგება.

„სწორედ ამიტომ არის ეს მილსადენი ასეთი მნიშვნელოვანი; ეს არის ჭიპლარი - თუ ის გაწყდება, უნგრეთის ეკონომიკა გაჩერდება“, - აღნიშნა ორბანმა.

გუშინ სერბეთის მთავრობამ განაცხადა, რომ უნგრეთისკენ მიმავალ გაზსადენზე დივერსიის მცდელობა განხორციელდა. მათი ინფორმაციით, გაზსადენის სიახლოვეს ასაფეთქებელი ნივთიერებებითა და დეტონატორებით სავსე დიდი პაკეტები იპოვეს. აღნიშნულთან დაკავშირებით, ვიქტორ ორბანმა ეროვნული უშიშროების საბჭოს სხდომა მოიწვია და შეხვედრის შემდეგ დავალება გასცა, რომ გაზსადენის უნგრეთის მონაკვეთი სამხედრო დაცვის ქვეშ მოქცეულიყო. უნგრეთის საგარეო საქმეთა მინისტრმა პეტერ სიიარტომ მიანიშნა, რომ დივერსიის მცდელობაში, შესაძლოა, უკრაინა ყოფილიყო ჩართული. ოფიციალურმა კიევმა ბრალდებები უარყო.

„უკრაინა ამასთან არანაირად არ არის დაკავშირებული. უფრო სავარაუდოა, რომ ეს არის რუსეთის „ყალბი დროშის ოპერაცია“, რომელიც უნგრეთის არჩევნებში მოსკოვის ფართომასშტაბიანი ჩარევის ნაწილია“, - განაცხადა უკრაინის საგარეო საქმეთა სამინისტროს პრესსპიკერმა, გეორგი ტიხიმ.