ირანთან დაკავშირებულმა ერაყულმა შეიარაღებულმა დაჯგუფება „კატაიბ-ჰეზბოლამ“ გატაცებული ამერიკელი ჟურნალისტი შელი კიტლსონი გაათავისუფლა, - ამის შესახებ აშშ-ის სახელმწიფო მდივანმა მარკო რუბიომ განაცხადა.

მისი ინფორმაციით, კიტლსონის გათავისუფლებაში მონაწილეობდნენ პენტაგონის, აშშ-ის გამოძიების ფედერალური ბიუროსა და ერაყის უზენაესი სასამართლო საბჭოს წარმომადგენლები.

„შვებით ამოვისუნთქეთ, რომ ეს ამერიკელი ახლა თავისუფალია და ვმუშაობთ მის ერაყიდან უსაფრთხოდ გამომგზავრებაზე“, - აღნიშნა რუბიომ.

კატაიბ-ჰეზბოლამ სამშაბათს ადრე განაცხადა, რომ კიტლსონს გაათავისუფლებდა და რომ მან დაუყოვნებლივ უნდა დატოვოს ერაყი.

Reuters-ს ინფორმირებულმა წყარომ განუცხადა, რომ მისი გათავისუფლება ერაყის მთავრობისა და რამდენიმე გავლენიანი შიიტი ლიდერის ძალისხმევის შედეგია, რომლებმაც გასამხედროებულ შეიარაღებულ დაჯგუფებაზე ზეწოლა მოახდინეს ჟურნალისტის გათავისუფლების უზრუნველსაყოფად.

შელი კიტლსონი მარტის ბოლოს ბაღდადში გაიტაცეს.