„ჰეზბოლამ“ ისრაელის წინააღმდეგ იერიშები შეაჩერა, - ინფორმაციას Reuters-ი „ჰეზბოლასთან“ დაახლოებულ წყაროებზე დაყრდნობით ავრცელებს.

გამოცემის წყაროების ცნობით, აშშ-სა და ირანს შორის მიღწეული ორკვირიანი ცეცხლის შეწყვეტის შეთანხმების ფარგლებში „ჰეზბოლამ“ ჩრდილოეთ ისრაელის მიმართულებით რაკეტების გაშვება და ლიბანში ისრაელის თავდაცვის ძალების წინააღმდეგ იერიშები შეაჩერა.

მანამდე, ისრაელმა სამხრეთ ლიბანში მოსახლეობას ევაკუაციისკენ მოუწოდა და მოსალოდნელი დარტყმების შესახებ გაფრთხილება გამოსცა.

აშშ-ის პრეზიდენტის, დონალდ ტრამპის მიერ ირანთან ცეცხლის შეწყვეტის გამოცხადების შემდეგ, ისრაელის პრემიერ-მინისტრმა ბენიამინ ნეთანიაჰუმ განაცხადა, რომ შეთანხმება ლიბანს არ მოიცავს.

ცნობისთვის, 2 მარტს ისრაელსა და „ჰეზბოლას“ შორის საბრძოლო მოქმედებების განახლების შემდეგ ლიბანში 1500-ზე მეტი ადამიანი დაიღუპა.