უკრაინამ რუსეთის ტყვეობიდან 182 ადამიანი დაიბრუნა, - ინფორმაციას უკრაინული მედია ქვეყნის პრეზიდენტზე ვოლოდიმირ ზელენსკიზე დაყრდნობით ავრცელებს.

უკრაინასა და რუსეთს შორის ტყვეთა მორიგი გაცვლა შედგა, რის შედეგადაც უკრაინაში 175 სამხედრო მოსამსახურე და 7 სამოქალაქო პირი დაბრუნდა.

უკრაინის პრეზიდენტის ცნობით, ტყვეობიდან დაბრუნებულებს შორის არიან უკრაინის შეიარაღებული ძალების, ეროვნული გვარდიისა და სახელმწიფო საზღვრის დაცვის სამსახურის სამხედრო მოსამსახურეები, ასევე, სამოქალაქო პირები.

„ჩვენი მეომრები უკრაინას სხვადასხვა ფრონტზე იცავდნენ: მარიუპოლის, ჩერნობილის ატომური ელექტროსადგურის, დონეცკის, ლუგანსკის, ხარკოვის, ხერსონის, ზაპოროჟიეს, სუმის, კიევისა და კურსკის მიმართულებებზე. ზოგიერთი მათგანი დაჭრილია. უმეტესობა ტყვეობაში 2022 წლიდან იმყოფებოდა”, - აცხადებს ზელენსკი.