გვინდა, დიდი მადლობა გადავუხადოთ ბატონ ორბანს და მის ადმინისტრაციას წლების განმავლობაში ჩვენს ქვეყანასთან ძალიან პროდუქტიული ურთიერთობისთვის, თანამშრომლობისთვის და მეგობრობისთვის - დარწმუნებულები ვართ, ეს ურთიერთობები გაგრძელდება ბატონი მადიარის ხელმძღვანელობით, - ამის შესახებ საპარლამენტო უმრავლესობის ლიდერმა, ირაკლი კირცხალიამ ჟურნალისტებთან განაცხადა.

მან პარტია „ტისას" ლიდერს, პიტერ მადიარს უნგრეთში გამართულ საპარლამენტო არჩევნებში გამარჯვება მიულოცა.

„ბატონ მადიარს და მის გუნდს ძალიან სერიოზულ გამარჯვებას ვულოცავ. მისასალმებელია ის პროცესი, რაც უნგრეთში ვნახეთ. ძალიან მშვიდ ვითარებაში ჩაიარა. გამარჯვებულმა ღირსეულად მიიღო გამარჯვება და დამარცხებულმა ღირსეულად მოულოცა გამარჯვებულს. ჩვენ გვინდა, დიდი მადლობა გადავუხადოთ ბატონ ორბანს და მის ადმინისტრაციას, წლების განმავლობაში ჩვენს ქვეყანასთან ძალიან პროდუქტიული ურთიერთობისთვის, თანამშრომლობისთვის და მეგობრობისთვის. ჩვენ, ასევე, დარწმუნებულები ვართ, რომ ეს მეგობრული, კონსტრუქციული, მნიშვნელოვანი ურთიერთობები გაგრძელდება ბატონი მადიარის ხელმძღვანელობით. ჩვენ მოვისმინეთ მისი განცხადებები. მის პირველ განცხადებაზე რა კომენტარიც შემიძლია გავაკეთო ისაა, რომ ძალიან კარგი მოსასმენია სუვერენული ქვეყნის წარმომადგენლის მხრიდან, იმიტომ, რომ ყველას კარგად მოგვეხსენება ევროკავშირში ის გამოწვევა, რომელიც ეხება სუვერენიტეტს. [მნიშვნელოვანია] ამ გამარჯვებული ადამიანის, მომავალი პრემიერ-მინისტრის ხედვა და დამოკიდებულება იმ ღირებულებების მიმართ, რომელიც ძალიან მჭიდროდ გვაკავშირებდა და ესეც გაგრძელდება. მოვისმინეთ მისი განცხადებები, რომ ის აპირებს თავისი ქვეყანა განვითარდეს იმ პრაგმატული პოლიტიკით, რომელსაც წლებია ირჩევს უნგრელი საზოგადოება“, - განაცხადა კირცხალიამ.

ცნობისთვის, უნგრეთის საპარლამენტო არჩევნებში გამარჯვებული „ტისას“ პარტიის ლიდერმა, პეტერ მადიარმა პრესკონფერენციაზე ტელეკომპანია „რუსთავი 2“-ის შეკითხვის საპასუხოდ განაცხადა, რომ მოუთმენლად ელის საქართველოსთან მუშაობას.

მისი თქმით, უნგრეთი სხვა ქვეყნების შიდა საქმეებში არ ჩაერევა.

„ძალიან მოხარული ვიქნები, რომ გესტუმროთ თბილისში და მოუთმენლად ველი თქვენთან მუშაობას, ჩვენ არ ჩავერევით სხვა ქვეყნების შიდა საქმეებში - ეს ჩვენი სტილი არ არის“, - განაცხადა მადიარმა.