თურქი მსახიობის, ჰანდე ერჩელის ანალიზებში გარკვეული სახის მეტაბოლიტების აღმოჩენის შემდეგ, სტამბოლის მთავარმა პროკურატურამ ანალიზების გადამოწმება მოითხოვა, - ინფორმაციას თურქული მედია ავრცელებს.

სტამბოლის პროკურატურამ სასამართლო მედიცინის ინსტიტუტს მიმართა, რათა დაადგინოს, ჰანდე ერჩელის ანალიზებში აღმოჩენილი მეტაბოლიტები აქტიური ფარმაცევტული ინგრედიენტებია თუ არა.

მანამდე, სასამართლო მედიცინის ინსტიტუტმა განაცხადა, რომ მსახიობის შარდის ნიმუშში მორფინი, კოდეინი, კოდეინის მეტაბოლიტი და პარაცეტამოლი აღმოჩნდა.

ამასთან, სტამბოლის სასამართლო მედიცინის ინსტიტუტის ანალიზების თანახმად, ერჩელს სისხლისა და თმის ნიმუშებში ნარკოტიკების კვალი არ აღმოაჩნდა.

შეგახსენებთ, გასულ თვეში სტამბოლის მთავარმა პროკურატურამ ნარკოტიკებთან დაკავშირებით მიმდინარე გამოძიების ფარგლებში 16 პირის დაკავების ორდერი გასცა. გამოძიების ფარგლებში პროკურატურამ დაკავების ორდერი თურქი მსახიობის, ჰანდე ერჩელის წინააღმდეგაც გამოსცა. ერჩელმა გამოძიების ფარგლებში პროკურატურას ჩვენება მისცა, ხოლო სასამართლო მედიცინის ინსტიტუტში სისხლისა და თმის ნიმუშების ჩაბარების შემდეგ გაათავისუფლეს. მსახიობმა პროკურატურისთვის მიცემულ ჩვენებაში განაცხადა, რომ „ნარკოტიკები ან სტიმულატორები არასდროს მიუღია“.