მე-14 საჯარო სკოლაში უკვე ორი კვირაა, რაც შეწყვეტილია სასწავლო პროცესი. ეს არის სრულიად მიუღებელი და საგანგაშო რეალობა იმ პირობებშიც კი, რომელშიც დღეს ვცხოვრობთ, - ამის შესახებ „ლელო-ძლიერი საქართველოს“ წარმომადგენელმა, ნიკა ჩერქეზიშვილმა აღნიშნა.

მისივე თქმით, ორი კვირის განმავლობაში პასუხისმგებელი პირებიდან ადგილზე არავინ გამოჩენილა.

ის მოუწოდებს განათლებისა და ინფრასტრუქტურის მინისტრებს, დაუყოვნებლივ მივიდნენ ადგილზე, შეხვდნენ მშობლებს, დაამყარონ მათთან ეფექტური კომუნიკაცია და საზოგადოებას წარუდგინონ მკაფიო გეგმა.

„დღეს, 14 აპრილს, ქართული ენის დღეა და სიმბოლურია, რომ სწორედ მე-14 საჯარო სკოლაში უკვე ორი კვირაა, რაც შეწყვეტილია სასწავლო პროცესი. ეს არის სრულიად მიუღებელი და საგანგაშო რეალობა იმ პირობებშიც კი, რომელშიც დღეს ვცხოვრობთ.

გაუგებარია, როგორ შეიძლება, შენს უწყებაში ასეთი მასშტაბის კრიზისი იყოს და შენ იძინებდე, იღვიძებდე, საუზმობდე, სადილობდე, სადღაც კაბინეტში იჯდე და არ ახდენდე არანაირ ქმედით რეაგირებას. როგორ შეიძლება, ყოველდღიურ რეჟიმში აგრძელებდე საქმიანობას და ამ მწვავე პრობლემის სასწრაფო გადაწყვეტისთვის ნაბიჯებს არ დგამდე?

ორი კვირის განმავლობაში პასუხისმგებელი პირებიდან ადგილზე არავინ გამოჩენილა.

იყო ერთი შეხვედრა ნაძალადევის რაიონის გამგეობაში, სრულიად არასაკმარისი და უშედეგო. კიდევ ერთხელ მოვუწოდებ განათლებისა და ინფრასტრუქტურის მინისტრებს, დაუყოვნებლივ მივიდნენ ადგილზე, შეხვდნენ მშობლებს, დაამყარონ მათთან ეფექტური კომუნიკაცია და საზოგადოებას წარუდგინონ მკაფიო გეგმა.

აუცილებელია კონკრეტული გარანტიების გაცემა, რომ უახლოეს პერიოდში გამოცხადდება ტენდერი სკოლის მშენებლობაზე და მანამდე უზრუნველყოფილი იქნება ალტერნატიული სასწავლო სივრცე“, - წერს ჩერქეზიშვილი სოციალურ ქსელში.