„ნაცმოძრაობა“ დღე და ღამესავით განსხვავდება მადიარის პარტიისგან, უნგრეთის მაგალითი აქ მოსაყვანიც არაა - „ქართულ ოცნებას“ თუ მოუწევს ჩანაცვლება, აუცილებლად ჩანაცვლდება ისევ ეროვნული ძალებით, - ამის შესახებ „ხალხის ძალის“ დეპუტატმა, გურამ მაჭარაშვილმა ოპოზიციაზე საუბრისას განაცხადა.

მისივე თქმით, „ქართულ ოცნებას“ არც „ნაცმოძრაობა“ და არც „მისი პარტიები“ არ ჩაანაცვლებენ.

„თქვენ თუ გულისხმობთ „ნაცმოძრაობას“ და მის დანაწევრებულ პარტიებს, მათ არანაირი სცენარი და გეგმა არ გააჩნიათ. ამას თავადაც ამბობენ. ვერც რევოლუციას აწყობენ და ვერც არჩევნებში იმარჯვებენ, იმიტომ რომ ორივე შემთხვევაში საზოგადოების მხარდაჭერა სჭირდება. თავად აღიარებენ, რომ ეს ხალხი დგას იმ ნარატივზე, რომელიც ქართული საზოგადოებისთვის მიუღებელია, მიუხედავად პოლიტიკური მხარდაჭერისა. უნგრეთის მაგალითი აქ მოსაყვანიც არაა. საერთოდ, ბატონი მადიარის პოლიტიკური მრწამსი 2-3 წლის წინ, ზუსტად იყო ერთი ერთში ის, რაც ჰქონდა ორბანს და ახლაც დარჩა ერთი ერთში. უბრალოდ იქ იყო პოლიტიკური დაპირისპირება და უნგრელმა საზოგადოებამ ისევ კონსერვატორული ძალა აირჩია, ოღონდ უფრო სხვა მიმართულებით. ეს არის და ეს. უნგრელ საზოგადოებას არ აურჩევია ის ძალა, რომელიც გამოვიდოდა და იტყოდა, „გაუმარჯოს ლგბტ მიმართულებას, გეი აღლუმებს მოვაწყობთ უნგრეთში, რუსეთს დავუპირისპირდებით“ და ა.შ. მადიარი რუსეთთან დაკავშირებით მოლაპარაკებებზე საუბრობს, ასევე, კონსერვატორულ მიმართულებაზე, საქართველოსთან დაკავშირებით მეგობრობაზე საუბრობს და ა.შ. ასე რომ, ჩერგოლეიშვილი იქნება თუ სხვა, სიზმრებში რას ნახულობენ ვერ გეტყვით, მაგრამ „ნაცმოძრაობა“ დღე და ღამესავით განსხვავდება მადიარის პარტიისგან, გამომდინარე მათი პრინციპული მიდგომებიდან. „ქართულ ოცნებას“ თუ მოუწევს, და ბუნებრივად ოდესმე მოუწევს, ჩანაცვლება, აუცილებლად ჩანაცვლდება ისევ ეროვნული ძალებით. როგორც უნგრეთის ისე საქართველოს მოსახლეობამ შეიძლება მიიღოს გადაწყვეტილება, რომ ჩაანაცვლოს ხელისუფლება, მაგრამ გარწმუნებთ, ეს არც ერთ შემთხვევაში არ იქნება არც „ნაცმოძრაობა" და არც მათი პარტიები. ესენი იქნებიან ეროვნული ძალები", - განაცხადა მაჭარაშვილმა.