ბიზნესმენ ლევან ჯანგველაძის შეკვეთით და ანგარებით განზრახ მკვლელობის ორგანიზებაში ბრალდებული ერთ-ერთი ძმის, გიორგი მიქაძის ადვოკატი ბრაიან გრინსპეი აცხადებს, რომ მისი დაცვის ქვეშ მყოფი არის კანადის მოქალაქე შესაბამისად, კანადის ინტერესია, რომ პროცესში სამართლიანობა იქნას უზრუნველყოფილი.

როგორც მან პროცესის დასრულების შემდეგ განაცხადა, სასამართლოში პროკურატურის მიერ წარმოდგენილ არგუმენტებს აკვირდება.

„52 წელია სისხლის სამართლის ადვოკატი ვარ კანადაში. აქ არგუმენტებს ვაკვირდები, რომლებიც პროკურატურამ დღეს შეიტანა და შაბათს ვიქნებით აქ, რათა დაცვის მხარის განცხადებები მოვისმინოთ მიქაძის საქმეში.

როგორც შეიძლება იცოდეთ, ბატონი მიქაძე კანადის მოქალაქეა და კანადაში ინტერესი არსებობს, რომ პროცესში სამართლიანობა იქნას უზრუნველყოფილი. და აქ იმისთვის ვართ, რომ დავაკვირდეთ და ვცადოთ ჩვენი პოზიციის დაცვა იმის უზრუნველყოფით, რომ პროცესი სამართლიანი და დაბალანსებულია”, - განაცხადა ადვოკატმა.

ბიზნესმენ ლევან ჯანგველაძის შეკვეთით და ანგარებით განზრახ მკვლელობის ორგანიზებაში ბრალდებულების, ძმები მიქაძეებისა და გიორგი ჯოხაძის საქმე დასკვნით ეტაპზეა.

ცნობისთვის, გამოძიება ძმებ გიორგი და დავით მიქაძეებს, ასევე გიორგი ჯოხაძეს ლევან ჯანგველაძის შეკვეთით მკვლელობის ორგანიზებას ედავება.

გიორგი ჯოხაძეს ასევე, გიორგი კაჭკაჭაშვილთან ერთად მართლსაწინააღმდეგოდ ჯგუფურად ცეცხლსასროლი იარაღების შეძენას ედავებიან.

ბიზნესმენ ლევან ჯანგველაძის შეკვეთითა და ანგარებით, განზრახ მკვლელობისთვის და გია ჩადუნელის მკვლელობის მცდელობისთვის მსჯავრდებულია გელა უძილაური. მას უვადო თავისუფლების აღკვეთა აქვს მისჯილი. აღნიშნული საქმის ფარგლებში ცეცხლსასროლი იარაღის მართლსაწინააღმდეგოდ გასაღების ფაქტზე მსჯავრდებულია სანდრო წივწივაძე, მას 8 წლით თავისუფლების აღკვეთა აქვს მისჯილი.

ამავე საქმის ფარგლებში ბრალდებულია ყოფილი გენერალური პროკურორი, ოთარ რომანოვ-ფარცხალაძე. მას ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარუდგინეს, რაც შეკვეთით და ანგარებით განზრახ მკვლელობის ორგანიზებას გულისხმობს.

აღნიშნული დანაშაული სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.

ოთარ რომანოვ-ფარცხალაძე რუსეთის მოქალაქეა, მის მიმართ საერთაშორისო ძებნაა გამოცხადებული.