თქვენ თუ გაინტერესებთ ირანის ელჩთან გვაქვს თუ არა იმავენაირად ურთიერთობა და გვაქვს თუ არა კომუნიკაცია, როცა გვაქვს გარკვეული წუხილები, გეტყვით, რომ კი, - ასე უპასუხა, საგარეო საქმეთა მინისტრმა, მაკა ბოჭორიშვილმა ჟურნალისტების შეკითხვას, რომელიც ირანის ისლამური რესპუბლიკის ელჩის, სეიედ ალი მოჯანის მიერ სოციალურ ქსელში გაკეთებულ განცხადებებს და მასზე საქართველოს საგარეო უწყების დამოკიდებულებას შეეხებოდა.

როგორც ბოჭორიშვილმა აღნიშნა, „დიალოგი ყველა ელჩთან არის, ვისთანაც ამის საჭიროება დგება“.

„თქვენ თუ გაინტერესებთ ირანის ელჩთან გვაქვს თუ არა იმავენაირად ურთიერთობა და გვაქვს თუ არა კომუნიკაცია, როცა გვაქვს გარკვეული წუხილები, გეტყვით, რომ კი. სამინისტროს აქვს თავისი რესურსი დიპლომატიური საქმიანობის განხორციელების და ყოველთვის აკეთებს იმას, რაც არის საჭირო. რა დონეზეც, როგორც არის საჭირო, დიალოგი ყველა ელჩთან არის, ვისთანაც ამის საჭიროება დგება“, - განაცხადა ბოჭორიშვილმა.

ცნობისთვის, ირანის ელჩმა 31 მარტს გაავრცელა განცხადებას, რომლის მიხედვითაც „როცა ზოგიერთი ქვეყანა, უნებლიეთ ან ნაჩქარევად საკუთარ სივრცესა და ტერიტორიას გარე ავანტიურისტებს უთმობს, ამის ფასს ადრე თუ გვიან, ქვეყნის შიგნითვე იწვნევს“. მისივე თქმით, „ისინი, ვინც გუშინ დონალდ ტრამპს მხარი აუბეს, დღეს იძულებულნი არიან ამ ნაბიჯის ფასი გადაიხადონ“. აღნიშნული განცხადების გამო საქართველოს საგარეო საქმეთა სამინისტროს ირანელი დიპლომატის უწყებაში დაბარებისკენ მოუწოდებდნენ. ირანის ელჩი სამინისტროში იმყოფებოდა კიდეც, თუმცა მისი თქმით, შეხვედრა თავად ითხოვა.