პარტია “დროას” ერთ-ერთი ლიდერის, გიგა ლემონჯავას განცხადებით, დიუშენის კუნთოვანი დისტროფიის საკითხთან დაკავშირებით იკვეთება ხელისუფლების „მანკიერი სახე“ და პრობლემების მიმართ „არაჰუმანური დამოკიდებულება“.

როგორც “ინტერპრესნიუსს” ლემონჯავამ მთავრობის ადმინისტრაციასთან მიმდინარე აქციაზე განუცხადა, სახელმწიფოს არ აინტერესებს ყველაზე მნიშვნელოვანი საკითხი, რაც არსებობს - ბავშვების ჯანმრთელობა და სიცოცხლე.

“დიუშენის კუნთოვანი დისტროფიის შემთხვევაში ჩანს ე.წ. ხელისუფლების ყველა ის მანკიერი სახე, რაც მას გააჩნია. ეს არის დეჰუმანიზებული ადამიანების ჯგუფი, რომლებსაც არ აინტერესებთ ყველაზე მნიშვნელოვანი, რაც შეიძლება ამ ქვეყნად არსებობდეს, ეს არის ბავშვების ჯანმრთელობა და სიცოცხლე. ჩვენ უპირობო მხარდაჭერას და სოლიდარობას ვუცხადებთ ოჯახებს, რომლებიც საკუთარი შვილების სიცოცხლის გადასარჩენად იბრძვიან. ამ სოლიდარობის და მხარდაჭერის გამო ვარ აქ”, - განაცხადა გიგა ლემონჯავამ.

შეგახსენებთ, მთავრობის ადმინისტრაციასთან დიუშენის კუნთოვანი დისტროფიის დიაგნოზის მქონე ბავშვების მშობლები საპროტესტო აქციებს მართავენ და ითხოვენ შესაბამის სამკურნალო მედიკამენტებს.