რა თქმა უნდა, მათ შეუძლიათ ნებისმიერი სახელი და გვარი დაწერონ საკუთარ ვებგვერდებზე, მაგრამ გვაინტერესებს როდის მოახერხებს გერმანული ბიუროკრატია გამოვიდეს მის მიერვე შექმნილი კომიკური მდგომარეობიდან?! - ამის შესახებ პრემიერ-მინისტრმა, ირაკლი კობახიძემ ჟურნალისტებს განუცხადა.

მისივე თქმით, გერმანიამ ვებგვერდზე საქართველოს პრეზიდენტად კვლავ სალომე ზურაბიშვილის მითითებით თავი კომიკურ სიტუაციაში ჩაიგდო.

„ჩვენ აქ სუბიექტური ინტერესი ნაკლებად გვაქვს. ეს უფრო მეტად ინტერესის საგანია ჩვენთვის როდის გადაწყვეტს გერმანული ადმინისტრაცია, გერმანული ბიუროკრატია გამოვიდეს შექმნილი ამ სრულიად კომიკური მდგომარეობიდან. ვნახოთ, ინტერესით ველოდებით ამ ყველაფერს. რა თქმა უნდა, მათ შეუძლიათ ნებისმიერი სახელი და გვარი დაწერონ საკუთარ ვებგვერდებზე, ჩვენთვის ეს არაფერს ცვლის, მაგრამ გვაინტერესებს როდის მოახერხებს გერმანული ბიუროკრატია გამოვიდეს მის მიერვე შექმნილი კომიკური მდგომარეობიდან?!“- განაცხადა კობახიძემ.

შეგახსენებთ, რომ „ქართული ოცნება“ გერმანიის საგარეო საქმეთა სამინისტროს იმის გამო აკრიტიკებს, რომ უწყების ვებგვერდზე, საქართველოს პრეზიდენტად კვლავ სალომე ზურაბიშვილია მითითებული.