ეს არის საუკეთესო პუტინისტურ ტრადიციაში გაკეთებული განცხადება, რომელიც არაფერს სხვას არ ასახავს გარდა „ქართული ოცნების“ პოლიტიკური შიზოფრენიისა, - ასე ეხმაურება „ძლიერი საქართველო - ლელოს“ აღმასრულებელი მდივანი თაზო დათუნაშვილი პრემიერ-მინისტრის, ირაკლი კობახიძის მიერ ოთხი ოპოზიციური პარტიის აკრძალვის შესახებ გაკეთებულ განცხადებას.

თაზო დათუნაშვილის განცხადებით, „ქართული ოცნება“ ოპოზიციას სიტუაციის ნორმალიზებისკენ მოუწოდებს, პარალელურად კი პარტიებს კრძალავს.

„ერთი ხელით მოგიწოდებენ სიტუაციის ნორმალიზებისკენ, ლაპარაკობენ სიტუაციის დესტაბილიზებაზე, გეუბნებიან, რომ გადაეფარებიან ჟურნალისტებს, გეუბნებიან, რომ ცუდი იყო ის, რაც მოხდა, გეუბნებიან, რომ უნდა შეურიგდე, მაგრამ მეორე ხელით კრძალავენ პარტიებს, ციხეში ჰყავთ ნახევარი ოპოზიცია, მეორე ნახევარს ემუქრებიან ციხით, ჟურნალისტებს ქუჩაში ურტყამენ, სიკვდილამდე მიჰყავთ და ამას არ იძიებენ. 300-ზე მეტი ადამიანია ნაწამები პოლიციური ძალების მიერ და არცერთი მათგანი არ არის დასჯილი. ეს არის პოლიტიკურ შიზოფრენია, რომლის მიზანიც არის პროპაგანდისტული ისტერიის დათესვა ქვეყანაში, რომ საზოგადოებას აურიონ საღერღელი. ქართველი ხალხი ბევრად უფრო ბრძენი და ჭკვიანია, ვიდრე „ქართული ოცნების“ მაღალჩინოსნები და რუსი პროპაგანდისტები, ვინც ეხმარებიან მათ ამ საქმეში“, - განაცხადა თაზო დათუნაშვილმა.