ნაცვლად იმისა, რომ ვიყენებდეთ არსებულ რესურსს იმისთვის, რომ გავმდიდრდეთ და შევქმნათ ძლიერი და სტაბილური სახელმწიფო, სამწუხაროდ, ვიქეცით ამ წუმპედ, რომელშიც კორუმპირებული „ქოცები“ ყიყინებენ ბაყაყებივით, - ამის შესახებ „ლელო-ძლიერი საქართველოს“ ერთ-ერთმა ლიდერმა გრიგოლ გეგელიამ კაია კალასის განცხადების საპასუხოდ აღნიშნა, რომელმაც ერევნის სამიტის ფარგლებში ჟურნალისტებთან შუა დერეფნის მნიშვნელობაზე ისაუბრა.

გეგელიას თქმით, საქართველოს, როგორც შუა დერეფნის ქვეყანას, ძალიან დიდი რესურსი და ისტორიული შანსი აქვს, რასაც დღეს საქართველო სრულად ვერ იყენებს.

„კაია კალასის განცხადებაში ჩვენ ვხედავთ ორ მნიშვნელოვან მომენტს - პირველი არის ხაზგასმა დაკავშირებადობის პოლიტიკაზე, რაც საქართველოსთვის, როგორც შუა დერეფნის სახელმწიფოსთვის არის უაღრესად მნიშვნელოვანი რამ. რა თქმა უნდა, დაკავშირებადობის პოლიტიკა გულისხმობს, რომ საქართველომ უნდა ააშენოს ანაკლიის ღრმაწყლოვანი პორტი და უნდა გამოიყენოს ეს შუა დერეფნის უნიკალური ისტორიული შესაძლებლობა, რაც ჩვენ, როგორც ერს და სახელმწიფოს ოდითგანვე გვქონდა. ამავე დროს, ჩვენ ვხედავთ იქვე ხაზგასმით ნათქვამს, რომ ამ რეჟიმთან, ამ ხელისუფლებასთან კაია კალასს და ევროპულ კავშირს აქვს მთელი რიგი საკითხები, პრობლემები და კითხვები, რაც არის ნათქვამი დაკავშირებადობის პოლიტიკასთან ბმაში. ეს არის ძალიან კარგი დასტური იმისა, რომ, ერთი მხრივ, ჩვენს ქვეყანას აქვს ძალიან მნიშვნელოვანი შანსი და რესურსი და მეორე, მხრივ, ამ რეჟიმის პირობებში ჩვენ ამ რესურსებს ვერ ვიყენებთ და ამის შედეგია ის საყოველთაო გაჭირვება, ის არნახული ფასების კრიზისი და ადამიანების გადინება ქვეყნიდან, რაც გვაქვს სახეზე. ნაცვლად იმისა, რომ ვიყენებდეთ არსებულ რესურსს იმისთვის, რომ გავმდიდრდეთ და შევქმნათ ძლიერი და სტაბილური სახელმწიფო, სამწუხაროდ, ვიქეცით ამ წუმპედ, რომელშიც კორუმპირებული „ქოცები“ ყიყინებენ ბაყაყებივით“, - განაცხადა გეგელიამ.

რაც შეეხება ერევნის სამიტში საქართველოს პრემიერ-მინისტრის მონაწილეობას, როგორც გეგელიამ აღნიშნა, კობახიძე აღნიშნულ სამიტს ბუტაფორიულად ელიან და მისთვის იქ არავის არაფერი აქვს სათქმელი.

„ჩვენ არაერთხელ გვინახავს, რომ ირაკლი კობახიძის პირობებში საქართველოს არც ერთი საგარეო პოლიტიკური ფორმატი არ გამოუყენებია ამ ქვეყნის, ჩვენი ერის ინტერესების საკეთილდღეოდ, შესაბამისად, არც ამ ფორმატს კობახიძე და მისი რეჟიმი არ გამოიყენებს და ვერ გამოიყენებს ჩვენი ქვეყნის პოლიტიკური და ეკონომიკური ინტერესების საკეთილდღეოდ. ჩვენ ვხედავთ ბუტაფორიულ დასწრებას ისეთ შეხვედრაზე, რომელიც, პირველ რიგში, თბილისში უნდა იმართებოდეს დღეს და არა სადღაც სხვაგან. ნაცვლად იმისა, რომ დღეს აქ ხდებოდეს მსგავსი რაღაცები, ნაცვლად იმისა, რომ თბილისი იყოს რეგიონული დინამიკის ცენტრი, ჩვენ ვხედავთ, რომ ცენტრი არის გადასული სხვაგან და კობახიძე, როგორც ბუტაფორია ესწრება შეხვედრას, სადაც მას არავინ ელის და სადაც მასთან სასაუბრო არავის არაფერი აქვს იმ მარტივი მიზეზით, რაც არის ის, რომ ამ ხელისუფლებამ ყველაფერი გააკეთა გასული 2 წლის განმავლობაში, რომ საქართველო ქცეულიყო იზოლაციურ ჭაობად, რომელსაც აღარ ჰყავს მეგობრები და პარტნიორები, რომელიც მტრებს ეძახის მოყვარეს, მოყვარეს ეძახის მტრებს, რომელიც ყველაფერს აკეთებს იმისთვის, რომ ჩვენი ქვეყნის ეროვნული ინტერესები იქნას ფეხქვეშ გათელილი“, - განაცხადა გეგელიამ.

ცნობისთვის, ერევანში ევროპული პოლიტიკური გაერთიანების სამიტი გაიხსნა.წლევანდელი სამიტის დევიზია „მომავლის მშენებლობა: ერთიანობა და სტაბილურობა ევროპაში“. სამიტს 30-ზე მეტი ევროპელი ლიდერი და კანადის პრემიერ-მინისტრი ესწრებიან.

სამიტის ფარგლებში ჟურნალისტებთან საუბარში ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა აღნიშნა, რომ აქვთ გვაქვს გარკვეული საკითხები საქართველოსთან დაკავშირებით, იმის გათვალისწინებით, რომ მთავრობა რეალურად არ დგამს რეალურ ნაბიჯებს მაშინ, როდესაც აცხადებენ, რომ სურთ ევროკავშირში გაწევრიანება. კითხვაზე, ამ გეოპოლიტიკურ ვითარებაში რამდენად მნიშვნელოვანია შუა დერეფანი, კალასმა უპასუხა:

„შუა დერეფანი ძალიან მნიშვნელოვანია. ვგულისხმობ იმას, რასაც ვხედავთ ახლო აღმოსავლეთში. ასევე, ყველა განიხილავს, როგორ უნდა მოხდეს სავაჭრო გზების დივერსიფიკაცია, შემცირდეს ერთი სავაჭრო გზის დახურვის რისკები. სწორედ ამიტომ არის უაღრესად მნიშვნელოვანი დაკავშირებადობა და ეს მარშრუტები. რა თქმა უნდა, უნდა ვნახოთ, რა შეგვიძლია გავაკეთოთ ამ მხრივ და ვინ არიან ჩვენი პარტნიორები“, - აღნიშნა კალასმა.