ამ სამიტშიც მონაწილეობდნენ კონკრეტული პოლიტიკოსები, რომელთაც არაერთხელ გაუკეთებიათ უსამართლო განცხადებები ქართველი ხალხის მიმართ, რაც სამწუხაროა - აქ, ჩვენ, საქართველოსთან მიმართებით კრიტიკული განცხადებები საერთოდ არ მოგვისმენია ,- ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს სომხეთში მიმდინარე ევროპული პოლიტიკური გაერთიანების (EPC) მე-8 სამიტზე საუბრისას განუცხადა.

პრემიერის თქმით, ყველასთან ჰქონდათ საუბარი იმ რეალობაზე, რაც ჩვენს ქვეყანაშია.

„რაც შეეხება დეზინფორმაციას ევროპული ბიუროკრატიის მხრიდან, ეს არის სერიოზული პრობლემაა, მუდმივად ვსაუბრობთ ამაზე. ეს სამწუხარო რეალობაა. იმედი მაქვს, ამ მიმართულებით ვითარება შეიცვლება.

რა თქმა უნდა, ამ სამიტშიც მონაწილეობდნენ კონკრეტული პოლიტიკოსები, რომელთაც არაერთხელ გაუკეთებიათ უსამართლო განცხადებები ქართველი ხალხის, ქვეყნის მიმართ, რაც სამწუხაროა. უნდა ვიმუშაოთ, ეს არის ის რეალობა, რა რეალობაშიც მუშაობა გვიწევს. მთავარია, მაქსიმალურად ვიზრუნოთ ყველა მიმართულებით ურთიერთობის განვითარებაზე. აქ ჩვენ საქართველოსთან მიმართებით კრიტიკული განცხადებები საერთოდ არ მოგვისმენია. ამ ფორმატში არ ყოფილა ამაზე საუბარი. გასაუბრება მქონდა არაერთ ლიდერთან, ამ ფორმატში ლიდერების ნახევარზე მეტთან გაქვს გასაუბრების საშუალება, ფორმატი ასეთია. ყველასთან გვქონდა საუბარი იმ რეალობაზე, რაც ჩვენს ქვეყანაშია“,- აღნიშნა პრემიერმა.