28 ნოემბრის განცხადების ერთ-ერთი მთავარი მიზეზი იყო რომ შანტაჟი დამთავრებულიყო - არავის არ აინტერესებდა არც ერთი ქვეყნის მიღება ევროკავშირში, ერთადერთი რისთვისაც აინტერესებდათ ეს თემა, იყო შანტაჟი და ჩვენ არ მივეცით ამ ხალხს შანტაჟის საშუალება,- ამის შესახებ საქართველოს პრემიერ-მინისტრმა ირაკლი კობახიძემ განაცხადა, როდესაც გამოეხმაურა მედიაში გავრცელებულ ინფორმაციას იმასთან დაკავშირებით, რომ საქართველო ევროკავშირის გაფართოების მინისტერიალზე არ მიიწვიეს.

მისი თქმით, არც ერთი მიწვევა მათთვის არ არის საინტერესო, თუ ეს ყველაფერი შანტაჟის ინსტრუმენტად იქნება გამოყენებული.

„28 ნოემბრის განცხადების ერთ-ერთი მთავარი მიზეზი იყო, რომ შანტაჟი დამთავრებულიყო და ვეღარ გვაშანტაჟებენ. ამითაც დამშვიდდა ჩვენი ქვეყანა, რომ უნდოდათ სამ თვეში ერთხელ დავეშანტაჟებინეთ, ხან ეს არ მოგვცეს, ხან იქ არ მიგვიწვიეს, ეს შანტაჟი დამთავრდა. არავის არ აინტერესებდა არც ერთი ქვეყნის მიღება ევროკავშირში, ერთადერთი რისთვისაც აინტერესებდათ ეს თემა, იყო შანტაჟი და ჩვენ არ მივეცით ამ ხალხს შანტაჟის საშუალება. საინტერესო არ არის არც შეხვედრებზე მიწვევა, არც ამის გახსნა, არც იმის გახსნა, თუ შანტაჟის ინსტრუმენტად გამოიყენება ეს ყველაფერი. არ გვაინტერესებს მათი შანტაჟი. როგორც კი გამოვა ამ საბჭოური მიდგომებიდან ევროპული ბიუროკრატია, მაშინვე გაჯანსაღდება ყველაფერი.“- განაცხადა კობახიძემ.