კოალიცია „ძლიერი საქართველო - ლელოს“ საქართველოში აკრედიტებულ დიპლომატიურ კორპუსს ხვდება. როგორც „ძლიერი საქართველო - ლელოს“ საგარეო მდივანმა, გრიგოლ გეგელიამ შეხვედრის დაწყებამდე ჟურნალისტებს განუცხადა, შეხვედრის მთავარი თემა ქვეყანაში არსებული პოლიტიკური ვითარება და კრიზისის დაძლევის გზები იქნება.

„გვაქვს შეხვედრა დიპლომატიური კორპუსის წარმომადგენლებთან. ეს არის მნიშვნელოვანი შესაძლებლობა იმისთვის, რომ ევროპული კავშირის და სრულიად ცივილიზებული სამყაროს სხვადასხვა დიპლომატიურ წარმომადგენელს გავაცნოთ ჩვენი პოზიციები. ის მოსაზრებები, თუ როგორ ვხედავთ ამ კრიზისის გადაჭრას, სად არის კრიზისის გადაჭრის გზები, რას ვაკეთებთ ჩვენ, „ლელო-ძლიერი საქართველო" იმისთვის, რომ ეს კრიზისი აღმოიფხვრას ქვეყანაში. ჩვენ გავაჟღერებთ დემოკრატიული პროტესტის ყველა ძირითად მოთხოვნას და გზავნილს, რომელიც გაგვაჩნია წელიწად ნახევრის განმავლობაში. ამავე დროს, ძალიან აქტიურად ვისაუბრებთ იმაზე, თუ რა უნდა გაკეთდეს იმისთვის, რომ საქართველო არ დავანებოთ რუსულ რეჟიმს, არ მოხდეს ჩვენი ქვეყნის იზოლაცია და ქართველი ხალხის ეროვნული ინტერესები საერთაშორისო ასპარეზზეც დაცული იყოს",-განაცხადა გეგელიამ.