ამ ადამიანებს ჰქონდათ დავალება გარე პატრონების მხრიდან. ჰქონდათ კონკრეტული გეგმა, რომ ქვეყანაში სახელმწიფო გადატრიალება მოეწყოთ, მაგრამ შესაბამისმა სამსახურებმა ძალიან მაღალ დონეზე იმუშავეს,-ასე შეაფასა თბილისის მერმა, „ქართული ოცნების“ გენერალურმა მდივანმა კახა კალაძემ 4 ოქტომბრის მოვლენებთან დაკავშირებით დაკავებულების საქმე.

როგორც კალაძემ აღნიშნა, მიუხედავად ხელისუფლების მოწოდებისა, რომ კანონსაწინააღმდეგო ქმედებები არ ჩაედინათ, ეს რაც არ გაითვალისწინეს, რის გამოც, „კანონის წინაშე პასუხი უნდა აგონ“.

„პირდაპირ სახელმწიფო გადატრიალების მცდელობა იყო. ჯერ მთელი თვეების განმავლობაში ჰქონდათ კამპანია იმასთან დაკავშირებით, თუ რას გეგმავდნენ. ამაზე აბსოლუტურად ღიად საუბრობდნენ, ყოველგვარი დამალვის გარეშე და 4 ოქტომბერს დაიწყეს უშუალოდ პროცესის განხორციელება, მივარდნენ პრეზიდენტის სასახლეში, გადაანგრიეს ღობე, შევარდნენ სასახლის ეზოში. შემდეგ, შესაბამისმა სამსახურებმა ძალიან მაღალ დონეზე იმუშავეს. მაშინ ყველას მოვუწოდებდით, შეგიძლიათ გაიხსენოთ ჩვენი განცხადებები, უამრავი მიმართვა მეც მაქვს გაკეთებული მოწოდების და თხოვნის სახით, რომ არ გადაედგათ ისეთი ნაბიჯი, რომელიც კანონსაწინააღმდეგო იქნებოდა, თუმცა, მესმის, ამ ადამიანებს ჰქონდათ დავალება გარე პატრონების მხრიდან. ჰქონდათ კონკრეტული გეგმა, რომ ქვეყანაში სახელმწიფო გადატრიალება მოეწყოთ, მაგრამ შესაბამისმა სამსახურებმა ძალიან მაღალ დონეზე იმუშავეს. ყველას პასუხი მოეთხოვება კანონის ფარგლებში“,-განაცხადა კალაძემ.