4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებული პოლიტიკოსების - პაატა მანჯგალაძისა და მურთაზ ზოდელავას ადვოკატის, ბექა ბასილაიას განცხადებით, საქალაქო სასამართლომ დაუსაბუთებელი და არაკანონიერი გადაწყვეტილება მიიღო.

ბასილაიას თქმით, სასამართლომ ხელისუფლების მიერ „შეკვეთილი“ გადაწყვეტილება მიიღო.

„ეს იყო სრულად დაუსაბუთებელი და არაკანონიერი გადაწყვეტილება. სასამართლომ გააჟღერა ის, რაც ხელისუფლებამ შეუკვეთა. გადაწყვეტილებას არანაირი ლოგიკური ახსნა არ აქვს და არც სამართლებრივი წინაპირობები. სასამართლოს მხრიდან სისხლის სამართლის კოდექსის 225-ე მუხლის პირველი ნაწილის გამოყენება აბსოლუტურად მცდარი იყო. ამავე დროს, მინდა ხაზი გავუსვა პაატა მანჯგალაძესთან დაკავშირებით, ის მინიმალური ცრუ სტანდარტიც კი , რასაც პროკურატურა წარმოადგენს პოლიტიკურად მოტივირებულ საქმეებზე, ესეც კი არ არსებობდა. არავითარი შემხებლობა, ბრალის დამადასტურებელი ოდნავი პწკარიც კი არ იყო მის მიმართ. ამავე დროს, ყველა სხვასთან უკანონო და დაუსაბუთებელი გადაწყვეტილება იქნა მიღებული“, - განაცხადა ბასილაიამ.