ხალხი ზუსტად იმდენად არის გაბედული, სადამდეც გაბედული არიან მისი ლიდერები - არავის ჭკუას არ ვარიგებ და მითუმეტეს ნიშნს არ ვუგებ, უბრალოდ საერთო ბრძოლაში ვართ და თანამებრძოლების ყოყმანი საერთო საქმეს აზარალებს, - ამის შესახებ საქართველოს მესამე პრეზიდენტი, მიხეილ სააკაშვილი სოციალურ ქსელში გამოქვეყნებულ პოსტში წერს.

“ფეისბუქზე“ გავრცელებულ წერილში სააკაშვილი ამბობს, რომ „დაუნდობელ დიქტატურასთან” ბრძოლაში “შუა გზაზე გაჩერებები და წუწუნი დამღუპველია“.

„მოდით, ნუ ვიკამათებთ - ხალხი ზუსტად იმდენად არის გაბედული, სადამდეც გაბედული არიან მისი ლიდერები. ამისი ნათელი მაგალითი იყო ვარდების და აჭარის რევოლუციები და განსაკუთრებით 2008 წელი. მაშინ, რომ ტერიტორიების გასხვისებაზე მომეწერა ხელი, რასაც მოკვლის პირდაპირი მუქარით მაიძულებდნენ, ან ქვეყანა დამეტოვებინა, როგორც მირჩევდნენ, ჩვენი ხალხი და სახელმწიფო ჩამოიშლებოდა და მტერი ბოლომდე გაგვანადგურებდა.

ცნობილ ფილოსოფოსს, ნადიმ თალებს აქვს თეორია, რომ ლიდერობა პირველ რიგში ნიშნავს, საკუთარი ტყავის თამაშში შეგდებას. ეს შეიძლება ნიშნავდეს, როგორც ჩემს შემთხვევაში მოხდა, ზღვის გადმოკვეთას და სიცოცხლის პირდაპირ საფრთხეში ჩაგდებას, მრავალწლიან პატიმრობას, მოწამვლას და სიკვდილთან მრავალწლიან ბრძოლას, შვილებთან და საყვარელ ადამიანებთან განშორებას, ყველა მატერიალური დოვლათის დაკარგვას.

მე არ ვამბობ, რომ სხვა პოლიტიკოსები იმავეს არ აკეთებენ, აკეთებენ და ეს ძალიან დასაფასებელია, მაგრამ რადგან ერთხელ გადაწყვიტე კლეპტოკრატიულ დაუნდობელ დიქტატურასთან ბრძოლა, შუა გზაზე გაჩერებები და წუწუნი დამღუპველია.

როგორმე უნდა გახვიდე ბოლომდე და რაღაც მომენტში ხალხი აუცილებლად გამოგყვება. არავის ჭკუას არ ვარიგებ და მითუმეტეს ნიშანს არ ვუგებ. უბრალოდ ჩვენ საერთო ბრძოლაში ვართ და თანამებრძოლების ყოყმანი ამ საერთო საქმეს აზარალებს“, - წერს სააკაშვილი.