დღეს ივანიშვილისთვის, რომელიც ცდილობს, რომ შეაჩეროს მასზე მზარდი წნეხი დასავლეთიდან და ამოეწეროს პუტინის მოკავშირეების სიიდან, ძალიან მნიშვნელოვანია უკრაინასთან და მის დღევანდელ ხელისუფლებასთან ურთიერთობების ნორმალიზაცია - აქ ორივე მხარეს აქვს ინტერესი, - ამის შესახებ „ლელო-ძლიერი საქართველოს“ ერთ-ერთმა ლიდერმა, სალომე სამადაშვილმა განაცხადა.

მისივე თქმით, საბოლოოდ, საქართველო მხოლოდ მოიგებს იმისგან თუ საქართველოსა და უკრაინას შორის ურთიერთობების გამოსწორების პროცესი დაიწყება.

„ჩვენ ვხედავთ, რომ რუსეთ-უკრაინის ომის დინამიკა მიდის აბსოლუტურად საწინააღმდეგოდ იმისა, რა მოლოდინიც ჰქონდა ბიძინა ივანიშვილს. დღეს ივანიშვილისთვის, რომელიც ცდილობს, რომ შეაჩეროს მასზე მზარდი წნეხი დასავლეთიდან და ამოეწეროს პუტინის მოკავშირეების სიიდან, ძალიან მნიშვნელოვანია უკრაინასთან და მის დღევანდელ ხელისუფლებასთან ურთიერთობების ნორმალიზაცია. ამიტომ აქ, პირველ რიგში, იკვეთება საქართველოს დღევანდელი მმართველი რეჟიმის ინტერესები. თუმცა ამასთან ერთად, ცხადია, რომ უკრაინის ინტერესებში შედის განახორციელოს და განავითაროს ის პროექტები, შავი ზღვის რეგიონში, რომელიც უკავშირდება უკეთეს სატრანზიტო შესაძლებლობებს, რომელიც უკავშირდება მათ შორის რუსეთის ინტერესების შემდგომ შევიწროებას შავი ზღვის რეგიონში და ამ თვალსაზრისით, საქართველოს ხელისუფლება, ვინც არ უნდა იყოს დღეს, არის მათთვის მნიშვნელოვანი პარტნიორი. ვფიქრობ, რომ აქ ორივე მხარეს აქვს ინტერესი და საბოლოოდ, საქართველო მხოლოდ მოიგებს იმისგან თუ ჩვენსა და უკრაინას შორის ურთიერთობების გამოსწორების პროცესი დაიწყება, ვინც არ უნდა მართავდეს დღეს ამ ქვეყანას“, - განაცხადა სალომე სამადაშვილმა.