ხდება პროცედურების, მექანიზმების დახვეწა, გამარტივება, ისევ და ისევ იმისთვის, რომ უფრო მეტად ეფექტიანად იმუშაოს სისტემამ და ნებისმიერი ინსინუაცია იმასთან დაკავშირებით, რომ თითქოს ამით ვინმე გარკვეულ გულგრილ დამოკიდებულებას აჩენს სათანადო საჭიროების მქონე პირებისადმი, თუ სოციალურად დაუცველი ოჯახებისადმი, რა თქმა უნდა, ეს არის მტკნარი სიცრუე და ტყუილი, - განაცხადა იურიდიულ საკითხთა კომიტეტის თავმჯდომარის პირველმა მოადგილემ თორნიკე ჭეიშვილმა, სოციალურად დაუცველთა ოჯახების სიებიდან ამოღების საკითხზე საუბრისას.

თორნიკე ჭეიშვილის განცხადებით, სამუშაოები მიმდინარეობს პროცედურების გასამარტივებლად და მექანიზმის დასახვეწად, რაც შეიძლება დაედოს საფუძვლად კონკრეტული ოჯახების სოციალურად დაუცველთა სიიდან ამოღებას, რომლებსაც თვეების განმავლობაში უფიქსირდებათ მაღალი შემოსავალი.

მისივე თქმით, მათ სურვილის შემთხვევაში ექნებათ უფლება იმისა, რომ მოითხოვონ კვლავ შემოწმება.

„კეთილი რჩევა იქნება უბრალოდ მათდამი, რომ ჯერ კარგად გაერკვნენ საკითხში, ჩაიხედონ რეალურად რა ცვლილებასთან გვაქვს საქმე. სინამდვილეში, ხდება დახვეწა მექანიზმისა, რომელიც შეიძლება საფუძვლად დაედოს კონკრეტული ოჯახის სოციალურად დაუცველთა ბაზიდან ამოღებას. აქ ლაპარაკია იმაზე, რომ შედარებით მაღალი შემოსავლის მქონე ოჯახები, რომლებიც თვეების განმავლობაში აფიქსირებენ მაღალ შემოსავალს სიღრმისეული გადამოწმების გარეშე შეიძლება იქნენ ამორიცხულნი სოციალურად დაუცველთა ბაზიდან, თუმცა, რა თქმა უნდა, თავის მხრივ, ეს არ არის საბოლოო გადაწყვეტილება და თუკი კონკრეტული ოჯახი მაინც მოითხოვს თავადვე, რომ მოხდეს მათი საკითხის კვლავ დღის წესრიგში დაბრუნება და მისი შემოწმება, რა თქმა უნდა, აღნიშნული განხორციელდება. შესაბამისად, ძალიან მარტივია ამ შემთხვევაში დასკვნა - ხდება პროცედურების, მექანიზმების დახვეწა, გამარტივება, ისევ და ისევ იმისთვის, რომ უფრო მეტად ეფექტიანად იმუშაოს სისტემამ და ნებისმიერი ინსინუაცია იმასთან დაკავშირებით, რომ თითქოს ამით ვინმე გარკვეულ გულგრილ დამოკიდებულებას აჩენს სათანადო საჭიროების მქონე პირებისადმი, თუ სოციალურად დაუცველი ოჯახებისადმი, რა თქმა უნდა, ეს არის მტკნარი სიცრუე და ტყუილი“, - განაცხადა თორნიკე ჭეიშვილმა.