16, 17, 23 მაისს, ახმეტელის თეატრი წარმოგიდგენთ სეზონის ერთ-ერთ ყველაზე რეზონანსულ პრემიერას, მე-20 საუკუნის ფრანგი დრამატურგის, ჟან ანუის საკულტო პიესას - "ანტიგონე", ირაკლი გოგიას რეჟისურით. ინფორმაციას ახმეტელის თეატრი ავრცელებს.

მათივე ცნობით, სპექტაკლი მაყურებელს სთავაზობს არა უბრალოდ ძველბერძნული მითის გადააზრებას, არამედ მწვავე დისკუსიას თანამედროვეობის უმნიშვნელოვანეს ეგზისტენციალურ საკითხებზე.

„სპექტაკლის ცენტრში ორი რადიკალურად განსხვავებული მსოფლმხედველობის შეჯახებაა. ანტიგონე არის სიმბოლო ახალგაზრდული შეუვალობისა, რომელიც უარს ამბობს სისტემის მიერ შემოთავაზებულ „კომფორტულ დუმილსა“ და „ნახევარ სიმართლეებზე“. მის პირისპირ კი დგას კრეონი - პრაგმატული ძალაუფლების განსახიერება, რომლისთვისაც სახელმწიფოებრივი წესრიგი და კანონი უზენაესი მორალია.

შესაძლებელია თუ არა ბედნიერება იქ, სადაც სიმართლე აკრძალულია?

სად გადის ზღვარი სახელმწიფოებრივ აუცილებლობასა და ადამიანურ ღირსებას შორის?

რამდენად საჭიროა მსგავსი რადიკალური დიქოტომიები ქვეყნის მომავლისთვის?

ჟან ანუიმ პიესა მეორე მსოფლიო ომის დროს, ოკუპირებულ პარიზში დაწერა, რაც ნაწარმოებს განსაკუთრებულ პოლიტიკურ და სოციალურ მუხტს სძენს. დადგმა იკვლევს იმ სახიფათო ზღვარს, რომელიც სახელმწიფოებრივ აუცილებლობასა და ადამიანურ ღირსებას შორის გადის,“ - აღნიშნულია ინფორმაციაში.

სპექტაკლის რეჟისორია ირაკლი გოგია, მხატვარი კი - მარიკა კვაჭაძე და ლანა გოგოლაძე.

სპექტაკლში მონაწილეობენ მსახიობები: ანა ჯავახიშვილი, ანდრია გველესიანი, ანანო გულედანი, ჯორჯი დვალიშვილი, გვანცა კანდელაკი, ნიკა თეთრაძე, სოფია სებისკვერაძე.