ბიზნესისა და ტექნოლოგიების უნივერსიტეტში კლაუს შვაბის წიგნის - „Universities, Professors, and Students in the Intelligent Age” - პრეზენტაცია გაიმართა.

ღონისძიება თავად წიგნის ავტორმა, World Economic Forum-ის დამფუძნებელმა, პროფესორმა კლაუს შვაბმა გახსნა. მან აუდიტორიას მიმართა და ისაუბრა უნივერსიტეტების, პროფესორებისა და სტუდენტების როლზე ინტელექტუალური ეპოქის ფორმირებაში.

გამოსვლაში კლაუს შვაბმა განსაკუთრებული ყურადღება გაამახვილა განათლების ტრანსფორმაციაზე, ხელოვნური ინტელექტის მზარდ გავლენასა და იმ ახალ პასუხისმგებლობაზე, რომელიც უნივერსიტეტებს თანამედროვე ტექნოლოგიური ცვლილებების პირობებში ეკისრებათ.

კლაუს შვაბმა საკუთარ გამოსვლაში განსაკუთრებულად გაუსვა ხაზი BTU-ს განვითარების ხედვას და აღნიშნა, რომ ბიზნესის, ტექნოლოგიების, მეწარმეობისა და ინოვაციების ინტეგრირებით უნივერსიტეტმა მნიშვნელოვანი ნაბიჯი გადადგა სისტემური აზროვნების მიმართულებით. მისი შეფასებით, თანამედროვე უნივერსიტეტების მთავარი ამოცანაა, სტუდენტებს ასწავლონ არა მხოლოდ ვიწრო, ერთ მიმართულებაზე ორიენტირებული ცოდნა, არამედ ჰორიზონტალური, ინტერდისციპლინური აზროვნება, რადგან დღევანდელ სამყაროში ეკონომიკური, პოლიტიკური, სოციალური, ტექნოლოგიური და გარემოსდაცვითი პროცესები ერთმანეთთან მჭიდროდ არის დაკავშირებული. შვაბის თქმით, ინტელექტუალურ ეპოქაში უნივერსიტეტებმა სტუდენტები უნდა აღჭურვონ იმ უნარებით, რომლებიც დაეხმარებათ კომპლექსური გამოწვევების გააზრებაში, ხელოვნური ინტელექტის ეპოქაში ადამიანური შესაძლებლობების განვითარებაში და ცოდნის პრაქტიკულ მოქმედებად გარდაქმნაში. ამ კონტექსტში მან BTU „მომავლის უნივერსიტეტად“ მოიხსენია და აღნიშნა, რომ უნივერსიტეტის მიმართულებები სწორედ იმ ხედვას ქმნის, რომელიც თანამედროვე განათლებისთვის აუცილებელია.

ღონისძიების ფარგლებში განხილული იყო წიგნში წარმოდგენილი ძირითადი იდეები - როგორ იცვლება სწავლებისა და კვლევის მოდელები ინტელექტუალურ ეპოქაში, რა უნარები დასჭირდებათ სტუდენტებს მომავლის შრომის ბაზარზე და როგორ უნდა მოემზადონ უნივერსიტეტები ახალი რეალობისთვის.

პრეზენტაციას ესწრებოდნენ აკადემიური წრის წარმომადგენლები, დარგის ექსპერტები, სტუდენტები და მოწვეული სტუმრები.

(R)