აქ პოპულისტური განცხადებების მთელი კორიანტელია - შალვა ნათელაშვილამდე ძალიან შორი გზა გაქვთ გასავლელი! ასე რომ, იმეცადინეთ - იქნებ პოპულიზმში მაინც ვინმეს რამე რეალური პოპულისტური შესთავაზოთ! - პოლიტიკაში ნული ხართ, რადგან თავის დროზე ქვეყანას უღალატეთ, როცა სიმტკიცის გამოჩენა ყველაზე მეტად სჭირდებოდა! ეს არის თქვენი ვერდიქტი! - ამ განცხადებით პარლამენტის პლენარულ სხდომაზე, “ქართული ოცნების“ დეპუტატმა ირაკლი ქადაგიშვილმა ფრაქცია “საქართველოსთვის“ დეპუტატებს მიმართა.

ქადაგიშვილმა პარტია “საქართველოსთვის“ ლიდერის გიორგი გახარიას პრემიერ-მინისტრის თანამდებობიდან გადადგომა გაიხსენა და ოპოზიციონერ კოლეგებს ბეგრაუნდისთვის შეხედვისკენ მოუწოდა.

“2021 წლის 16 თებერვალს უმრავლესობის შეკრება იყო, სადაც ასეთი საკითხი განიხილებოდა - “ნაციონალური მოძრაობა“ მისი ლიდერის ნიკა მელიას მეშვეობით პირდაპირ ამბობდა: ქვეყანაში ყველა ინსტიტუტს ჩამოვაქცევ, კანონებს არ დავემორჩილები, არც ერთი კანონი ამ ქვეყანაში არ შესრულდება და ვერც ერთი ინსტიტუცია ამას ვერ უზრუნველყოფს. მაშინ იმ შეკრებაზე მიღებული იყო გადაწყვეტილება, რომ ან “ნაციონალური მოძრაობის“ დესტრუქციას აყოლილი ქვეყანა ჩამოიქცევა ან სახელმწიფო ფუნქციონირების გაგრძელებას შეძლებს.

პრემიერ მინისტრი გიორგი გახარია იყო, რომელსაც ამ გადაწყვეტილების მიღება უნდა უზრუნველეყო. მაშინ გიორგი გახარია მოგვიტრიალდა და დეპუტატებს მოგვმართა: - ხომ იცით ამ გადაწყვეტილებას დასავლეთისგან, საელჩოებისგან ძალიან ბევრი ჩარევა და კრიტიკა მოჰყვება, დაიწყება ზეწოლები, რომელიმე ხართ აქ ისეთი, ვინც ამ ზეწოლას არ გაუძლებთ და მერე ჩემკენ ხელს არ გამოიშვერთ?!

ამას თითქმის სტენოგრამის დონეზე გეუბნებით! რა თქმა უნდა, ჩვენ ყველამ ვთქვით, რომ ყველანი პრემიერ-მინისტრის კი არა, სახელმწიფოს გარშემო დავდგებოდით და სახელმწიფოს არ ჩამოაქცევინებდით. ზუსტად ორ დღეში, დილას ეს ადამიანი ადგა და კურდღელივით გაიქცა, ქვეყანა და სახელმწიფო “ნაციონალური მოძრაობის“ მიერ ჩამოშლის საშიშროების წინაშე დატოვა, რადგან ვიღაცას გარედან საქართველოს მიმართ სულ სხვა მიზნები ჰქონდა და არა დემოკრატისაა და ევროკავშირის სვლის ხელშეწყობის. სხვა რამისთვის ამზადებდნენ და დღესაც ცდილობენ, რომ მოამზადონ ეს ქვეყანა! მაშინ ჩაერთო ამ ფერხულში - სხვა ქვეყნების ინტერესების სამსახურში და არა საქართველოს ინტერესების და სახელმწიფოს დასაცავად და დღეს აქ ვიღაც მორალს გვიკითხავს.

ეგ მორალი არ გავა, იმიტომ რომ "ბექგრაუნდს" უნდა შეხედოთ!“, - მიმართა ირაკლი ქადაგიშვილმა ფრაქცია “საქართველოსთვის“ დეპუტატებს.