„ოპოზიციის ალიანსის“ ლიდერები “კარდაკარის“ ფარგლებში მოსახლეობასთან შეხვედრას განაგრძობენ.

ისინი ამჯერად მეტრო „ახმეტელის“ მიმდებარე ტერიტორიაზე იმყოფებოდნენ.

ოპოზიციონერმა პოლიტიკოსებმა ფლაერები დაარიგეს, რომელზეც 26 მაისის აქციის შესახებ ინფორმაცია არის განთავსებული. ისინი საზოგადოებას დაგეგმილი აქციის მნიშვნელობაზეც გაესაუბრნენ და საპროტესტო აქციაში მონაწილეობისკენ მოუწოდეს.

“26 მაისს ძალიან ბევრი ადამიანი მოდის, ძალიან ბევრი ხალხი იქნება და ამ აქციას ძალიან საინტერესო შინაარსი ექნება. იქნება მსვლელობა - უნივერსიტეტიდან პარლამენტამდე წამოვალთ. გვექნება ბევრი სიახლე, ამიტომ ყველას ვთხოვ, რომ მოვიდეს, ჩვენ ძალიან საინტერესო პროცესს ვიწყებთ.

ზოგადად, ხალხს ერთიანობა და ერთად დგომა გვჭირდება, რათა იმ ბევრ უსამართლობას, რაც დღეს ქვეყანაში ხდება, გავუმკლავდეთ. ეს დღე არის 26 მაისი. საღამოს 19:00 საათზე დავიწყებთ და დარწმუნებული ვარ, ძალიან ბევრი ხალხი მოვა.

დაახლოებით, 10 ათასამდე ადამიანთან უკვე გვქონდა კონტაქტი. ეს კამპანია იმისთვის არის, რომ მეტ ადამიანს მივაწოდოთ ინფორმაცია, რომ 26 მაისს შეკრებაა. ასევე, გვსურს გავესაუბროთ საზოგადოებას, მოვისმინოთ მოქალაქეების აზრი. ზოგადად, ვფიქრობ, რომ პოლიტიკოსები კაბინეტებში კი არ უნდა ისხდნენ, როგორც დღეს “ქართული ოცნების” წარმომადგენლები არიან, არამედ ხალხთან ერთად უნდა იყვნენ ქუჩაში. ეს კამპანია ყოველდღე გაგრძელდება”, - აღნიშნა “სტრატეგია აღმაშენებლის” ლიდერმა, გიორგი ვაშაძემ.