ეს არის სხვადასხვა უცხოური ძალის მცდელობა, რომ საქართველოში თავისუფალი მედია დახურონ - ვინაიდან სხვანაირად ვერ ასრულებენ მუქარას, ახლა თავის ვიწრო წრეში პატარა პწკენას ცდილობენ თავისუფალი მედიის წინააღმდეგ, - ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა, რითაც ევროპარლამენტის მიერ „იმედის“ დასანქცირებას გამოეხმაურა.

მისივე თქმით, საქართველოს პარლამენტში მედიის აკრედიტაციასთან დაკავშირებით რეგულაციები „10-ჯერ უფრო მსუბუქია, ვიდრე ევროპარლამენტში“.

პაპუაშვილი ამბობს, რომ აპირებს იფიქროს, საქართველოს პარლამენტის აკრედიტაციის წესებში შეიტანოს თუ არა ზუსტად ისეთივე ცვლილებები, როგორიც ევროპარლამენტშია.

„რა თქმა უნდა, ეს არის იმ კონტექსტში დასანახი, რასაც ჩვენ ბოლო პერიოდში ვისმენთ და ნაბიჯებს ვხედავთ. ეს არის სხვადასხვა უცხოური ძალის მცდელობა, რომ საქართველოში თავისუფალი მედია დახურონ. ფაქტია, რომ მთავარი, რასაც უფრთხის დღეს ბრიუსელი, არის მართალი სიტყვა. როგორც ჩანს, ძალიან აფრთხობთ ის სიმართლე, რომელიც საბოლოო ჯამში, ესმით. არ მუშაობს მთელი ის პროპაგანდა, რომელიც მოქოქილი იყო და მილიონობით იხარჯებოდა საქართველოს ინტერესების წინააღმდეგ, ამიტომ ეს არის საქართველოში თავისუფალი მედიის დახურვის ნაწილი. ეს არის მედიის წინააღმდეგ დიდი ბრიტანეთის მიერ მიღებული მტრული გადაწყვეტილების გაგრძელება, რომლის მიზანია, დაიხუროს თავისუფალი მედია. დიდი ხანია მუქარას ვისმენდით ქალბატონი რასასგან, რომელიც ქართველი ხალხის მიმართ ფაშისტური განცხადებებით გამოირჩევა. ვინაიდან სხვანაირად ვერ ასრულებენ ამ მუქარას, ახლა თავის ვიწრო წრეში პატარა პწკენას ცდილობენ თავისუფალი მედიის წინააღმდეგ.

მეორე მხრივ, ჩემთვის პირადად ძალიან საინტერესო იყო ამ ყველაფრის მოსმენა. ევროკავშირმა დახარჯა ასობით ათასი ევრო იმისთვის, რომ გაეშავებინა საქართველოს პარლამენტი. აკრედიტაციის წესებთან დაკავშირებით იყო საქართველოს პარლამენტზე თავდასხმა. აღმოჩნდა, რომ თურმე, ევროპარლამენტში არის უფრო მკაცრი წესები, ვიდრე საქართველოს პარლამენტში. კერძოდ, საქართველოს პარლამენტში ერთ-ერთი წესია, ჟურნალისტს შეუძლია დაიწყოს ინტერვიუ, მაგრამ თუკი რესპონდენტი ეტყვის რომ შეწყვიტოს ინტერვიუ, უნდა შეწყვიტოს. აღმოჩნდა, რომ ევროპარლამენტში თურმე წინასწარი თანხმობაა საჭირო. საინტერესოა, ვიფიქრებთ ამაზე. მეორე - როდესაც ირღვევა წესი, სანქცია გვაქვს, აკრედიტაციის ერთი თვით შეჩერება და განმეორებით კი 6 თვით. რამდენი წლით შეუჩერეს „იმედს“?! 1 წლით. კარგია, ამაზეც ვიფიქრებთ. მე ვაპირებ ვიფიქრო, შევიტანო თუ არა შესაბამისის ცვლილებები აკრედიტაციის წესში. პირველი - ვიფიქრო ამაზე, შევიტანო ცვლილებები თუ არა რომ წინასწარ თანხმობა მიიღოთ რესპონდენტებიდან, თუკი ევროპული წესი ეს ყოფილა. მეორე - აკრედიტაციის შეჩერების ვადებზეც ვიფიქრებ. ხომ ნახეთ რა წესები ყოფილა ევროპარლამენტში, ვიფიქრებთ, ჩვენთანაც ზუსტად იგივე წესები გავრცელდეს თუ არა.

არსებობს კარგი სიტყვა „ფარისევლობა“. უნდა მიხვდეთ რა ფარისევლობაა ევროპარლამენტში, ბრიუსელში. რა ფარისევლები სხედან ევროკავშირის საელჩოში,“ - განაცხადა პაპუაშვილმა.

ცნობისთვის, „იმედის“ განცხადებით, ევროპარლამენტმა შენობაში მუშაობა ერთი წლით აუკრძალა. ტელეკომპანიის ცნობით, მიზეზი ევროპარლამენტარ, რასა იუკნევიჩიენესთან ინტერვიუს მცდელობა გახდა.