[ფასების რეგულირების კომისიის] ეს სამარცხვინო შედეგი უნდათ, რომ როგორმე მოკლან, როგორც ახალი ამბავი. საქართველოს მოსახლეობას კიდევ ერთხელ თვალებში ნაცარი შეაყარონ. სესია იქნება კიდევ ერთი გააქტიურების საშუალება, - ამის შესახებ „ლელო-ძლიერი საქართველოს“ ერთ-ერთმა ლიდერმა, თაზო დათუნაშვილმა განაცხადა, რითაც გამოეხმაურა პარლამენტის თავმჯდომარის, შალვა პაპუაშვილის განცხადებას, სადაც ის ამბობს, რომ პლენარულ სხდომაზე კომისიის დასკვნის გამოტანა არ არის დაგეგმილი.

თაზო დათუნაშვილის თქმით, ეს არის სამარცხვინო დასკვნა.

„მეცნიერულ ხასიათზე ლაპარაკობენ ადამიანები, რომელსაც სრულფასოვანი საშუალო განათლება არ აქვთ მიღებული. რეალურად აბსოლუტური კრახია. ამ კომისიამ და 5-თვიანმა ეპოპეამ მთავრობის მიერ ფასების დაკლებასთან დაკავშირებით, საკუთარი თავი პოვა სუპერმარკეტების ფასდაკლებულ პროდუქტებში. ეს იყო მთელი შედეგი ამ ყველაფრის.

ეს სამარცხვინო შედეგი უნდათ, რომ როგორმე მოკლან, როგორც ახალი ამბავი. საქართველოს მოსახლეობას კიდევ ერთხელ თვალებში ნაცარი შეაყარონ. სესია იქნება კიდევ ერთი გააქტიურების საშუალება. იცით, პარლამენტში გახარიას გუნდი წარმოდგენილია. ოპოზიცია მინიმალურად, მაგრამ წარმოდგენილია. გახარიას გუნდი დასვამს კრიტიკულ კითხვებს. ამ კრიტიკულ კითხვებზე არაფერზე პასუხები არ აქვთ და არც სურვილი აქვთ, რომ ეს თემა გაუგრძელდეთ. ხომ ხედავთ აკანკალებულ ხმას შოთა ბერეკაშვილის, რომელიც ვეღარ ლაპარაკობს, სახეზე ფერი არ ადევს და სერიოზულად მეშინია რამე არ დაემართოს“,- განაცხადა თაზო დათუნაშვილმა.

ცნობისთვის, პარლამენტის თავმჯდომარემ, შალვა პაპუაშვილმა განაცხადა, რომ ფასების შემსწავლელი დროებითი საპარლამენტო კომისიის დასკვნის პლენარულ სხდომაზე განხილვა არ იგეგმება.

„ანგარიში გადაეცა ბიუროს და ბიურომ ეს ცნობად მიიღო. პლენარულ სხდომაზე გამოტანა არ არის დაგეგმილი. თავად პროცესი საჯარო იყო. მე მგონი, ჩართული იყო მთელი ქვეყანა, მედიის, მოსახლეობის ჩათვლით და საპარლამენტო ოპოზიციის ჩათვლით. ასე რომ, ყველა მიგნება და დასკვნა საჯარო და განხილულია ისედაც. ისედაც საჯარო დოკუმენტია, გამოქვეყნდა. ისედაც ცნობად აქვს მიღებული მთავრობას“, - განაცხადა პაპუაშვილმა.