სახალხო დამცველის აპარატს კასპის პირველი საჯარო სკოლის მოსწავლეები ეწვივნენ
საქართველოს სახალხო დამცველმა კასპის პირველი საჯარო სკოლის მოსწავლეებს უმასპინძლა.
სახალხო დამცველის აპარატის ცნობით, შეხვედრაზე ლევან იოსელიანმა მოსწავლეებს ადამიანის უფლებათა დაცვის მექანიზმები, სახალხო დამცველის აპარატის მანდატი და საქმიანობის ძირითადი მიმართულებები გააცნო.
„ასევე მიმოიხილა აპარატის პრაქტიკული საქმიანობის ასპექტები და ისაუბრა უვადოდ თავისუფლებააღკვეთილი მსჯავრდებულების უფლებრივ მდგომარეობაზე.
სახალხო დამცველმა ყურადღება გაამახვილა ადამიანის უფლებების ცოდნისა და ზოგადად, განათლების მნიშვნელობაზე ახალგაზრდების ყოველდღიურ ცხოვრებაში.
მოსწავლეებს შესაძლებლობა ჰქონდათ პირადად სახალხო დამცველისგან მიეღოთ პასუხები მათთვის საინტერესო საკითხებზე. ისინი დაინტერესდნენ თემატიკით, რომლის თაობაზეც სახალხო დამცველის აპარატს ყველაზე ხშირად მიმართავენ და ასევე სახელმწიფო უწყებების მხრიდან სახალხო დამცველის რეკომენდაციების შესრულების მაჩვენებლებით“,- აღნიშნულია ინფორმაციაში.
