საქართველოს გენერალურმა პროკურორმა გიორგი გვარაკიძემ, გენერალური პროკურორის მოადგილესთან ამირან გულუაშვილთან, ეკონომიკური დეპარტამენტის უფროსთან შოთა ქარჩავასთან, თბილისის მუნიციპალური განვითარების ფონდის აღმასრულებელ დირექტორთან გიორგი შონიასთან და აღმასრულებელი დირექტორის მოადგილესთან შოთა ანდრიაძესთან ერთად თბილისის პროკურატურის ახალი შენობის სამშენებლო სამუშაოები დაათვალიერა.

ამის შესახებ ინფორმაციას საქართველოს პროკურატურა ავრცელებს.

მათი ცნობით, გენერალური პროკურორი ახალი შენობის მშენებლობის მიმდინარე პროცესს გაეცნო და შესრულებული და ჩასატარებელი სამუშაოების შესახებ ინფორმაცია მიიღო.

როგორც გენერალურმა პროკურორმა გიორგი გვარაკიძემ აღნიშნა, თბილისის პროკურატურის თანამედროვე სტანდარტების ახალი შენობა შენდება, რომელიც მორგებული იქნება პროკურატურის თანამშრომლების საჭიროებებზე და ყველა პირობა იქნება შექმნილი ნაყოფიერი საქმიანობისთვის. ახალ შენობაში ასევე განთავსდება თანამედროვე სტანდარტების შესაბამისი პროკურატურის სასწავლო ცენტრი.

„ახალ ადმინისტრაციულ შენობაში თბილისის რაიონული პროკურატურები განთავსდება. უკვე არაერთი წელია რაიონული პროკურატურების თანამშრომლები შინაგან საქმეთა სამინისტროს ქალაქ თბილისის პოლიციის დეპარტამენტის შენობაში გამოყოფილ ოთახებში მუშაობენ.

ასევე, ახალ შენობაში მოეწყობა სათანადო ტექნიკური მოწყობილობებით აღჭურვილი, ბავშვზე მორგებული გამოკითხვის ოთახი ასევე, მოქალაქეთა მისაღები, სადაც პროკურატურაში მისული მოქალაქეებისთვის მაღალი ხარისხის სერვისის შეთავაზება იქნება შესაძლებელი.

პროკურატურის თანამშრომელთა თანამედროვე სამუშაო გარემოს უზრუნველყოფა და სამუშაო პირობების გაუმჯობესება საქართველოს პროკურატურის ერთ-ერთ მნიშვნელოვან პრიორიტეტს წარმოადგენს.

პროკურატურის ახალი შენობა და კომფორტული გარემო კიდევ უფრო ეფექტიანს გახდის თანამშრომლების საქმიანობას“,- ნათქვამია ინფორმაციაში.