ევროპას არ უწევს არჩევანის გაკეთება უსაფრთხოებასა და დემოკრატიას შორის. მას ეს არასდროს გაუკეთებია და არც შეიძლება ახლა დაიწყოს, - ამის შესახებ ევროპის საბჭოს გენერალური მდივნის ალენ ბერსეს ყოველწლიურ ანგარიშშია აღნიშნული, რომელიც მან ევროპის საბჭოს 46 წევრი სახელმწიფოს საგარეო საქმეთა მინისტრებს მინისტრთა კიშინიოვში, კომიტეტის ყოველწლიურ სხდომაზე წარუდგინა.

ანგარიშში, სახელწოდებით „ევროპის ახალი დემოკრატიული პაქტი რღვევის ეპოქაში“, ალენ ბერსე გამოდის მოწოდებით, შეიქმნას ისეთი სამართლებრივი და დემოკრატიული ჩარჩო, რომელზეც ევროპის მდგრადი უსაფრთხოება იქნება დამოკიდებული და ასევე აღდგეს ინსტიტუტების მიმართ ხალხის ნდობა.

„რადგან ევროპა ცივი ომის შემდეგ უპრეცედენტო მასშტაბით ხელახლა იარაღდება, ჩვენ უნდა ვიკითხოთ, რას ვიცავთ სინამდვილეში და იქნება თუ არა მხოლოდ ძალა საკმარისი. სწორედ აქ აკლია ევროპის ამჟამინდელი უსაფრთხოების მოდელი და აქედან უნდა დაიწყოს დემოკრატიული უსაფრთხოება“, - აღნიშნულია ანგარიშში.

ალენ ბერსე ხაზს უსვამს რუსეთის მიერ უკრაინაში სრულმასშტაბიანი შეჭრისა და სხვა საერთაშორისო კრიზისების შედეგად მიყენებულ ზიანს.

„ყოველი უპასუხოდ დატოვებული მუქარა ან ძალის გამოყენება საერთაშორისო სამართლებრივ წესრიგს უფსკრულის პირს კიდევ უფრო აახლოებს“, - აღნიშნულია ანგარიშში.

მისი თქმით, უცხოური ინფორმაციის მანიპულირება და ჩარევა, დემოკრატიული სისტემებისადმი ნდობის ეროზიასთან ერთად, ძირს უთხრის როგორც კანონის უზენაესობას, ასევე სოციალურ სტაბილურობას და ევროპულ დემოკრატიებს შიგნიდან უქმნის საფრთხეს.

გენერალური მდივანი ხაზს უსვამს, რომ სოციალური უფლებების, ჯანდაცვის, განათლებისა და ინსტიტუციური ნდობის სტრატეგიული მნიშვნელობა დიდი ხნის განმავლობაში არასაკმარისად იყო შეფასებული და უარყოფილი.

„ნამდვილი უსაფრთხოება იწყება ისეთი ინსტიტუტებით, რომლებსაც ადამიანები ენდობიან, და ისეთი დემოკრატიებით, რომლებიც საკმარისად მდგრადია ზეწოლის გასაძლებად,“ - აღნიშნულია ანგარიშში.

გენერალური მდივანი აცხადებს, რომ ევროპის ახალი დემოკრატიული პაქტის ამბიციაა ინსტიტუტების მიმართ ნდობის აღდგენა და დემოკრატიული მდგრადობის გაძლიერება მუდმივი კრიზისების ეპოქაში.

„ეს ყველაზე ნათლად უკრაინაში ჩანს. იქ ევროპის საბჭო ხელს უწყობს რუსეთის აგრესიული ომისთვის პასუხისმგებლობის მექანიზმების შექმნას იქ, სადაც ადრე მსგავსი რამ არ არსებობდა, ამავდროულად კი აღდგენისა და რეკონსტრუქციის პროცესის ცენტრში დემოკრატიულ მდგრადობას აყენებს,“ - აღნიშნულია ანგარიშში.

გენერალური მდივნის 2026 წლის წლიური ანგარიში ექვს თავად არის დაყოფილი : ინფორმაციის მანიპულაციისა და დეზინფორმაციის წინააღმდეგ ბრძოლა და მდგრადობის გაძლიერება; სოციალური უფლებების ხელშეწყობა, როგორც დემოკრატიული მდგრადობის ფაქტორი; თანასწორი უფლებების დაცვა და გენდერული თანასწორობისა და ინკლუზიის მხარდაჭერა; არჩევნებისა და დემოკრატიული პროცესების დაცვა; ინკლუზიური მონაწილეობა, სამოქალაქო სივრცე და ფუნდამენტური თავისუფლებები; ციფრული ტექნოლოგიებისა და ხელოვნური ინტელექტის პოზიტიური გამოყენება, მათ შორის კიბერსაფრთხეებთან ბრძოლა.

ანგარიში ხაზს უსვამს ევროპის საბჭოს მიმდინარე საქმიანობის მნიშვნელობას და ასევე წარმოაჩენს მსჯელობისა და შესაძლო სამომავლო ქმედებების ახალ მიმართულებებს, მათ შორის იდეებსა და ინიციატივებს, რომლებიც პაქტის საკონსულტაციო პროცესის ფარგლებში გამოიკვეთა.