უკრაინამ და რუსეთმა ტყვეების გაცვლა განახორციელეს, რის შედეგადაც უკრაინის 205 მოქალაქე შინ დაბრუნდა, - ინფორმაციას უკრაინული მედია პრეზიდენტ ვოლოდიმირ ზელენსკიზე და ომის ტყვეებთან მოპყრობის საკოორდინაციო შტაბზე დაყრდნობით ავრცელებს.

„205 უკრაინელი სახლში ბრუნდება. დღეს, უკრაინის შეიარაღებული ძალების, ეროვნული გვარდიისა და სახელმწიფო სასაზღვრო სამსახურის ჯარისკაცები რუსული ტყვეობიდან ბრუნდებიან. ეს 1000-ი 1000-ზე გაცვლის პირველი ეტაპია. გათავისუფლებულებს შორის არიან რიგითები, სერჟანტები და ოფიცრები. მათი უმეტესობა რუსეთის ტყვეობაში 2022 წლიდან იმყოფებოდა. ისინი იცავდნენ უკრაინას მარიუპოლში და აზოვსტალში, დონეცკის, ლუგანსკის, ხარკოვის, ხერსონის, ზაპოროჟიეს, სუმის და კიევის მიმართულებებით, ასევე ჩერნობილის ატომურ ელექტროსადგურზე“, - წერს უკრაინის პრეზიდენტი სოციალურ ქსელში.

ომის ტყვეებთან მოპყრობის საკოორდინაციო შტაბის ინფორმაციით, ჯარისკაცებისა და სერჟანტების გარდა, 50-ზე მეტი ოფიცერი დააბრუნეს სახლში.

გათავისუფლებული სამხედრო მოსამსახურეებიდან ყველაზე ახალგაზრდა 21 წლისაა, ყველაზე უფროსი კი - 62 წლის.