ჯერ ერთი, ეს განცხადება უპრინციპობაზე მეტყველებს, როცა კაცს „თვალთხარიას“ ეძახი და მერე მასთან გაერთიანებაზე საუბრობ, რა თქმა უნდა, ეს უპრინციპობის გამოხატულებაა, თუმცა, მათთვის ეს აბსოლუტურად დამახასიათებელია, უკლებლივ ყველა ამ პარტიისთვის უპრინციპობა, - ამის შესახებ პრემიერ-მინისტრმა, ირაკლი კობახიძემ განაცხადა, როდესაც ისაუბრა „ოპოზიციური ალიანსის“ ერთ-ერთი ლიდერის, ნიკა გვარამიას განცხადებაზე, რომ ალიანსში პარტია „ლელო“ და პარტია „გახარია საქართველოსთვის“ უნდა მიიღონ.

ირაკლი კობახიძის შეფასებით, სინამდვილეში, ყველა ეს პოლიტიკოსი არის ერთი კოლექტიური ძალის წარმომადგენლობა.

„სინამდვილეში, ყველა ეს პოლიტიკოსი არის ერთი კოლექტიური ძალის წარმომადგენლობა, ეს არის უცხოური აგენტურა, „კოლექტიური ნაცმოძრაობა“, შესაბამისად, მათ შორის ეს რაღაც კონფლიქტებიც არის აბსოლუტურად ხელოვნური. ეს არის ერთი ძალა. მათ აერთიანებთ ერთი რამ - ყველა მათგანი არის უცხოური აგენტურის წარმომადგენელი, ყველა მათგანი არის კოლექტიური „ნაცმოძრაობის“ წარმომადგენელი, იქნება ეს გვარამია, „ლელო“, გახარია, თუ ნებისმიერი სხვა, ეს არის ერთი პოლიტიკური ძალა, რომელიც მოქმედებს ერთი ქოლგის ქვეშ და ამ „ქოლგას“ ჰქვია უცხოური აგენტურა“, - განაცხადა კობახიძემ.