ევროპის საბჭოს 46 წევრი ქვეყნის საგარეო საქმეთა მინისტრების მიმდინარე ყოველწლიურ შეხვედრაზე, 36-მა ქვეყანამ და ევროკავშირმა გამოთქვეს განზრახვა, შეუერთდნენ უკრაინის წინააღმდეგ აგრესიის დანაშაულის გამოძიებისთვის სპეციალური ტრიბუნალის შექმნის შესახებ ახალ გაფართოებულ ნაწილობრივ შეთანხმებას, - ამის შესახებ აღნიშნულია პრესრელიზში, რომელსაც ევროპის საბჭო აქვეყნებს.

„ამ სახელმწიფოებმა გადამწყვეტი ნაბიჯი გადადგეს სპეციალური ტრიბუნალის ფაქტობრივი შექმნისა და უკრაინის წინააღმდეგ აგრესიისთვის პასუხისმგებლობის აღიარებისკენ. სპეციალური ტრიბუნალი წარმოადგენს სამართლიანობას და იმედს. ახლა საჭიროა ამ პოლიტიკური ვალდებულების შესრულებისთვის ზომების მიღება ტრიბუნალის ფუნქციონირებისა და დაფინანსების უზრუნველყოფით. დროა, რუსეთმა პასუხი აგოს თავისი აგრესიისთვის. ჩვენს წინ სამართლიანობის გზაა - და სამართლიანობამ უნდა გაიმარჯვოს“, - განაცხადა ევროპის საბჭოს გენერალურმა მდივანმა, ალენ ბერსემ შეხვედრაზე.

გენერალურმა მდივანმა მოუწოდა სახელმწიფოებს, რაც შეიძლება მალე დაასრულონ ყველა საჭირო ეროვნული პროცედურა სპეციალურ ტრიბუნალში გასაწევრიანებლად.

პრესრელიზში აღნიშნულია, რომ ტრიბუნალი გამოიძიებს, დაადანაშაულებს და გაასამართლებს იმ პირებს, რომლებიც ძირითადად პასუხისმგებელნი არიან უკრაინის წინააღმდეგ აგრესიის დანაშაულზე. მისი მიზანია შეავსოს სისხლის სამართლის საერთაშორისო სასამართლოს იურისდიქციაში არსებული ხარვეზი და პასუხისგებაში მისცემს ამ დანაშაულში ჩართულ მაღალჩინოსნებს.

გაფართოებული ნაწილობრივი შეთანხმება მინისტრთა კომიტეტის რეზოლუციით მიიღეს. მასში მონაწილეობის სურვილი გამოთქვეს ევროპის საბჭოს ოცდათოთხმეტმა წევრმა სახელმწიფომ (ანდორა, ავსტრია, ბელგია, ხორვატია, კვიპროსი, ჩეხეთი, დანია, ესტონეთი, ფინეთი, საფრანგეთი, გერმანია, საბერძნეთი, ისლანდია, ირლანდია, იტალია, ლატვია, ლიხტენშტეინი, ლიეტუვა, ლუქსემბურგი, მოლდოვას რესპუბლიკა, მონაკო, მონტენეგრო, ნიდერლანდები, ნორვეგია, პოლონეთი, პორტუგალია, რუმინეთი, სან-მარინო, სლოვენია, ესპანეთი, შვედეთი, შვეიცარია, უკრაინა, გაერთიანებული სამეფო) და ევროკავშირმა, ავსტრალიამ და კოსტა-რიკამ.