დაბალი წარმოდგენის ვარ მაკა ბოჭორიშვილის დიპლომატიურ შესაძლებლობებზე და ვერ გეტყვით რაიმე გარდამტეხს მოიტანს თუ არა მისი შეხვედრები, მაგრამ ცალსახად ვხედავ, რომ პოლიტიკური შიზოფრენიის მორიგი ფაზა დაეწყება „ქართულ ოცნებას,- ამის შესახებ „ლელო-ძლიერი საქართველოს“ ერთ-ერთმა ლიდერმა, თაზო დათუნაშვილმა განაცხადა, რითაც კიშინეუში მიმდინარე, ევროპის საბჭოს მინისტრთა კომიტეტის 135-ე სესიაში საქართველოს ვიცე-პრემიერისა და საგარეო საქმეთა მინისტრის, მაკა ბოჭორიშვილის მონაწილეობა შეაფასა.

მისი თქმით, მაკა ბოჭორიშვილი „ფოტოების გადასაღებად მინისტრებს აეკიდება, რათა გამოჩნდეს თუ რამდენ ხალხს ხვდება“.

„დაბალი წარმოდგენის ვარ მაკა ბოჭორიშვილის დიპლომატიურ შესაძლებლობებზე და ვერ გეტყვით რაიმე გარდამტეხს მოიტანს თუ არა მისი შეხვედრები. მაგრამ ცალსახად ვხედავ, რომ პოლიტიკური შიზოფრენიის მორიგი ფაზა დაეწყება „ქართულ ოცნებას“.

როდესაც მაკა ბოჭორიშვილი იქ მინისტრებს აეკიდება და შეეცდება, რომ ფოტოები გადაიღოს, რომ გამოჩნდეს თუ რამდენ ხალხს ხვდება, პარალელურად, აქ ივანიშვილის პოლიტიკური მარტორქა, შალვა პაპუაშვილი გამოვა და ჩვენი ევროპელი პარტნიორების უშვერი სიტყვებით ლანძღვა-გინებას გააგრძელებს.

მის შეხვედრებს რა შედეგი მოჰყვება არ ვიცი, მაგრამ ქალბატონ ბოჭორიშვილს ახალი დავალება აქვს რომ აქვს, რომ ევროკავშირთან ურთიერთობები დაათბოს, ეს ცალსახად ჩანს“,- განაცხადა თაზო დათუნაშვილმა.

ინფორმაციისთვის, საქართველოს ვიცე-პრემიერი, საგარეო საქმეთა მინისტრი, მაკა ბოჭორიშვილი კიშინეუში, ევროპის საბჭოს მინისტრთა კომიტეტის 135-ე სესიაში იღებს მონაწილეობას. საგარეო საქმეთა სამინისტროს ინფორმაციით, მაკა ბოჭორიშვილი მინისტრთა კომიტეტის სესიის მონაწილეებს სიტყვითაც მიმართავს.

ევროპის საბჭოს მინისტრთა კომიტეტის 135-ე შეხვედრა მოლდოვის რესპუბლიკის თავმჯდომარეობით იმართება. მინისტერიალის დასრულების შემდგომ, მოლდოვის რესპუბლიკა მინისტრთა კომიტეტის თავმჯდომარეობას გადასცემს მონაკოს, რომელიც კომიტეტს მომდევნო ექვსი თვის განმავლობაში უხელმძღვანელებს.