„შეფურთხება“ - ეს არის ჩემი პასუხი „ოცნების“ უმსგავსო ლაპარაკზე „მონანიების” შესახებ,- ასე ეხმაურება პარტია „დროას“ ლიდერი, ელენე ხოშტარია, პატიმრების შეწყალების შესახებ „ქართული ოცნების“ ლიდერების განცხადებებს.

ელენე ხოშტარიას შეფასებას პარტია „დროა“ სოციალურ ქსელში აქვეყნებს.

„ერთხელ ერთმა ტირანმა, დაატყვევა თავისუფალი უდანაშაულო ადამიანი და ჩაიფიქრა, რომ ვაწამებ და რაღაცას ვათქმევინებო. ამ თავისუფალმა უდანაშაულო ადამიანმა ხმა გაიკმინდა და სახეში შეაფურთხა.

ეს არის ჩემი პასუხი „ოცნების“ უმსგავსო ლაპარაკზე „მონანიების“ შესახებ.

ის მართლა ტირანი მაინც იყო…“- წერს ელენე ხოშტარია.

ცნობისთვის, საქართველოს პრემიერ-მინისტრმა, ირაკლი კობახიძემ დღეს განაცხადა, რომ სინანული და ჩადენილი დანაშაულის მონანიება იქნება მთავარი, რის შემდეგაც მათი დამოკიდებულება შეიცვლება, თუმცა აქვე აღნიშნა, რომ პატიმრების შეწყალება, პრეზიდენტის, მიხეილ ყაველაშვილის პრეროგატივაა და შესაძლოა მან შეწყალებასთან დაკავშირებით, სხვადასხვა ფაქტორი მიიღოს მხედველობაში.

„სასამართლო მოქმედებს მკაცრად სამართლებრივი სტანდარტებით. შეწყალება პოლიტიკური გადაწყვეტილებაა და შესაძლოა პრეზიდენტმა სხვადასხვა ფაქტორი მიიღოს მხედველობაში. სასამართლო პოლიტიკური მიზანშეწონილობით ვერ იხელმძღვანელებს. მონანიება და დანაშაულის აღიარება არის მთავარი. ვიდრე არ დავინახავთ აღიარებას, სინანულსა და მონანიებას, მანამდე ჩვენი მხრიდან განსხვავებული დამოკიდებულება ვერ იქნება“,- განაცხადა ირაკლი კობახიძემ.