რუსეთის სტავროპოლის მხარეში ქიმიურ ქარხანაზე დრონებით თავდასხმა განხორციელდა, - ამის შესახებ ინფორმაციას უკრაინული მედია რუსულ „ტელეგრამ“ არხებზე დაყრდნობით ავრცელებს.

მედიის ცნობით, დრონებით თავდასხმის შედეგად სტავროპოლის მხარეში, ქალაქ ნევინომისკში მდებარე „აზოტის“ ქიმიური ქარხნის ტერიტორიაზე ხანძარი გაჩნდა.

„ნევინომიისკის აზოტის“ ქარხანა რუსეთში აზოტოვანი სასუქების ერთ-ერთი უმსხვილესი მწარმოებელია.

სტავროპოლის მხარის გუბერნატორმა, ვლადიმერ ვლადიმეროვმა განაცხადა, რომ დრონებით თავდასხმის შედეგად არავინ დაშავებულა.

ასევე, რუსული „ტელეგრამ“ არხების ინფორმაციით, დრონებით თავდასხმა განხორციელდა თათრეთის რესპუბლიკის ქალაქ ნაბერეჟნიე-ჩელნიში მდებარე ელექტრომოწყობილობების საწარმოზეც.

თათრეთის რესპუბლიკის ხელისუფლების ცნობით, საწარმოში გაჩენილი ხანძარი ლოკალიზებულია.