"საქართველოს ბიზნეს ასოციაცია" ოჯახის სიმტკიცისა და კეთილდღეობის მნიშვნელობის შესახებ განცხადებას ავრცელებს.

"საქართველოს ბიზნეს ასოციაცია" (BAG) ოჯახური ღირებულებების მნიშვნელობას განსაკუთრებულად უსვამს ხაზს და სრულიად საქართველოს ულოცავს ოჯახის სიწმინდისა და მშობლების პატივისცემის დღეს.

"ეს დღე, რომელიც სრულიად საქართველოს კათოლიკოს-პატრიარქის, უწმინდესისა და უნეტარესის ილია II-ის ინიციატივით დაწესდა, კიდევ ერთხელ მკაფიოდ შეგვახსენებს იმ ფუნდამენტურ ფასეულობებს, რომლებზეც დგას თითოეული ადამიანის, საზოგადოების და სახელმწიფოს სიმტკიცე, სტაბილურობა და განვითარება.

"საქართველოს ბიზნეს ასოციაციისთვის", როგორც ქვეყნის ერთ-ერთი წამყვანი ბიზნეს გაერთიანებისთვის, ოჯახი წარმოადგენს არა მხოლოდ სოციალურ, არამედ ეკონომიკური მდგრადობის მნიშვნელოვან საფუძველს. ჯანსაღი, მყარი და დაცული ოჯახური გარემო პირდაპირ აისახება საზოგადოების კეთილდღეობაზე, შრომის პროდუქტიულობაზე, პროფესიულ მოტივაციასა და ქვეყნის ეკონომიკურ პროგრესზე.

„ოჯახი არის ის მთავარი სივრცე, სადაც ყალიბდება მომავალი თაობის ღირებულებები, ენერგია და პასუხისმგებლობა. ჩვენ მტკიცედ გვჯერა, რომ ძლიერი საზოგადოებისა და წარმატებული ეკონომიკის საფუძველი სწორედ ძლიერი და ჯანსაღი ოჯახია.

ამ ღირებულებების გათვალისწინებით, ქართული ბიზნესი მომავალშიც გააგრძელებს ისეთი ინიციატივებისა და პროექტების მხარდაჭერას, რომლებიც ემსახურება ოჯახების ეკონომიკურ გაძლიერებას, სოციალური სტაბილურობის განმტკიცებასა და საზოგადოების კეთილდღეობის ზრდას",- ნათქვამია "საქართველოს ბიზნეს ასოციაციის" განცხადებაში.

(R)