უკრაინის ეროვნული ანტიკორუფციული ბიუროს დეტექტივები, სპეციალიზებულ ანტიკორუფციულ პროკურატურასთან ერთად, უზენაეს სასამართლოში კორუფციის საქმეზე საგამოძიებო მოქმედებებს ატარებენ, - ინფორმაციას უკრაინული მედია ეროვნული ანტიკორუფციული ბიუროს პრესსამსახურზე დაყრდნობით ავრცელებს.

„საგამოძიებო მოქმედებები ტარდება უზენაესი სასამართლოს მოქმედი და ყოფილი მოსამართლეების სამუშაო ადგილებზე, საცხოვრებელ სახლებსა და ავტომობილებში. კერძოდ, ეს ეხება უზენაესი სასამართლოს ყოფილ თავმჯდომარეს, რომლის საქმესაც უმაღლესი ანტიკორუფციული სასამართლო განიხილავს. დეტალები მოგვიანებით გამოქვეყნდება“, - აცხადებენ უკრაინის ეროვნულ ანტიკორუფციულ ბიუროში.

უკრაინული მედია წერს, რომ უზენაესი სასამართლოს ყოფილი თავმჯდომარის სახელი არ სახელდება, თუმცა, სავარაუდოდ, საუბარია ვსევოლოდ კნიაზევზე, რომელიც ადვოკატთან ერთად 2023 წლის 15 მაისს დანაშაულის ჩადენისას დააკავეს. კნიაზევი მოგვიანებით, გირაოს გადახდის შემდეგ გაათავისუფლეს.