რუსეთი ლატვიის წინააღმდეგ კიდევ ერთ დეზინფორმაციულ კამპანიას იწყებს და ავრცელებს ტყუილს, თითქოს უკრაინა ლატვიის რუსეთის ტერიტორიაზე თავდასხმების ბაზად გამოყენებას გეგმავს, - ამის შესახებ ლატვიის პრემიერ-მინისტრი ევიკა სილინა სოციალურ პლატფორმა X-ზე წერს.

მისი განმარტებით, ლატვიას არასდროს მიუცია უკრაინისთვის ნებართვა, მისი ტერიტორია დარტყმებისთვის გამოეყენებინა.

„ლატვიას არასდროს მიუცია უკრაინისთვის ნებართვა, მისი ტერიტორია ან საჰაერო სივრცე რუსეთის ან სხვა რომელიმე ქვეყნის წინააღმდეგ თავდაცვითი დარტყმებისთვის გამოეყენებინა. ჩვენ ეს არაერთხელ ავხსენით საერთაშორისო ასპარეზზე“, - წერს ლატვიის პრემიერი.

ამასთან, ევიკა სილინა ხაზს უსვამს, რომ რუსეთი აგრესორია და უკრაინას ყველა უფლება აქვს, თავი დაიცვას.

ცნობისთვის, რუსეთის საგარეო დაზვერვის სამსახურმა განაცხადა, რომ კიევი ლატვიის ტერიტორიიდან რუსეთის რეგიონებზე „ახალი ტერორისტული თავდასხმების განსახორციელებლად ემზადება“.