„ილიას გზით განათლებისთვის“, - ამ სახელწოდებით ილიას სახელმწიფო უნივერსიტეტის პირველ კორპუსთან აქცია მიმდინარეობს.

ადგილზე შეკრებილები არიან სტუდენტები და აკადემიური სფეროს წარმომადგენლები. ისინი განათლების რეფორმის გაუქმებას მოითხოვენ.

აქციის მონაწილეები აცხადებენ, რომ დაგეგმილი რეფორმებით კითხვის ნიშნის ქვეშ დგას უნივერსიტეტის ავტონომია და სტუდენტების განათლების ხარისხი.

„შეკრების მიზანი და მიზეზია, ე.წ. განათლების რეფორმა. სახელმწიფომ ის როგორი ფორმითაც შემოგვთავაზა, არღვევს აკადემიური სფეროს მოთხოვნებს, არღვევს უნივერსიტეტის ავტონომიას და ა.შ.

სტუდენტებმა და აკადემიური სფეროს წარმომადგენლობამ, ერთობლივი სარჩელი მოვამზადეთ. სარჩელში ყურადღება გამახვილებულია იმაზე, რომ სახელმწიფოს ხელშეკრულებით ჰქონდა ნაკისრი, რომ უნდა გვესწავლა ოთხწლიან პროგრამაზე, ეს იყო შემოთავაზებული, თუმცა ეს ყველაფერი მხედველობაში აღარ მიიღეს“, - განაცხადა აქციის ერთ-ერთმა მონაწილემ.