„ქართული ოცნების“ საპატიო თავმჯდომარის, ბიძინა ივანიშვილის ბიზნესცენტრთან დიუშენის სინდრომით დაავადებული ბავშვის მშობელმა აქცია გამართა.

როგორც კახა წიქარიშვილი აცხადებს, ბიძინა ივანიშვილის სახლთან ერთკაციანი აქცია ტრადიციულ სახეს მიიღებს და ყოველ ოთხშაბათ-პარასკევს, 19:00 საათზე, მშობლები ადგილზე მივლენ წამლის შემოტანის მოთხოვნით.

„აქ მოვედი იმისათვის, რომ ჩავატარო ერთკაციანი აქცია, რადგან შსს-მ აგვიკრძალა 2-3-4-კაციანი შეკრების ჩატარება, ამიტომ ვატარებ ერთკაციან აქციას.

ხელისუფლების ყველა შტოსთან დაგვეკეტა კარები, ამიტომ მოვედით ბიძინა ივანიშვილთან, რომელიც არის „ქართული ოცნების“ საპატიო თავმჯდომარე და პირდაპირ მას ვუთხრათ, რომ ჩვენი ბავშვები არიან სიცოცხლისთვის საშიშ მდგომარეობაში, მათი მდგომარეობა ყოველდღე უარესდება. ერთადერთი რაც უნდა გააკეთოს სახელმწიფოს, ეს არის შემოიტანოს მედიკამენტები“, - განაცხადა კახა წიქარიშვილმა.