უკრაინის პრეზიდენტის, ვოლოდიმირ ზელენსკის სერბეთში ვიზიტი გადაიდო. ამის შესახებ ინფორმაცია უკრაინის პრეზიდენტის კომუნიკაციის საკითხებში მრჩეველმა, დმიტრი ლიტვინმა დაადასტურა.

“გადავწყვიტეთ, რომ სხვა თარიღებში ჯობია, მანამდე კი, იქ კაჩკა [უკრაინის ვიცე-პრემიერი] იქნება რამდენიმე საკითხის მოსამზადებლად”, - უპასუხა ლიტვინმა კითხვაზე, ვოლოდიმირ ზელენსკის სერბეთში ვიზიტთან დაკავშირებით არსებული ცნობების შესახებ.

ცნობისთვის, მანამდე სერბულმა მედიამ წყაროებზე დაყრდნობით ინფორმაცია გაავრცელა, რომ მიმდინარე კვირის ბოლოს სერბეთში უკრაინული დელეგაციის ვიზიტი იგეგმება, რომელსაც შესაძლოა თავად ვოლოდიმირ ზელენსკი ხელმძღვანელობდეს.

მოგვიანებით, უკრაინულმა მედიამ ინფორმაცია გაავრცელა, რომ ბელგრადში უკრაინის ევროპული და ევროატლანტიკური ინტეგრაციის საკითხებში ვიცე-პრემიერი, ტარას კაჩკა გაემგზავრება.