ისრაელი საერთაშორისო საზოგადოების მხრიდან კრიტიკის ობიექტი გახდა მას შემდეგ, რაც ეროვნული უსაფრთხოების მინისტრმა, იტამარ ბენ-გვირმა პალესტინელების მხარდამჭერი დაკავებული აქტივისტების ვიდეო გაავრცელა.

მედიის ინფორმაციით, იტალიამ, საფრანგეთმა, კანადამ, ნიდერლანდებმა, ბელგიამ და პორტუგალიამ ისრაელის ელჩები დაიბარეს. ისრაელის საქმეთა დროებითი რწმუნებული დაიბარა ესპანეთმაც.

იტამარ ბენ-გვირის მიერ სოციალურ ქსელ X-ზე გამოქვეყნებულ ვიდეომასალაში ჩანს, თუ როგორ სხედან აშდოდის პორტში ჰუმანიტარული ფლოტილიის აქტივისტები, რომლებიც ღაზას სექტორისკენ მიემართებოდნენ და ისრაელის საზღვაო ფლოტმა შეაჩერა, მუხლებზე დაჩოქილები. მათ ხელები ზურგს უკან აქვთ შეკრული და თავდახრილი არიან. ბენ-გვირი მათ შორის დადის ისრაელის დროშით და ყვირის: „კეთილი იყოს თქვენი მობრძანება ისრაელში, ჩვენ ვართ აქ ბატონ-პატრონები“. ვიდეოს თან ახლავს წარწერა: „ასე ვესალმებით ტერორიზმის მხარდამჭერებს“.

ფლოტილია „სუმუდი“ 14 მაისს თურქეთის ქალაქ მარმარისიდან გავიდა და 18 მაისს ისრაელის საზღვაო ძალებმა საერთაშორისო წყლებში, ღაზადან დაახლოებით 250 საზღვაო მილის დაშორებით, შეაჩერეს. ორგანიზატორების თქმით, 40-ზე მეტი ქვეყნიდან 428 ადამიანი დააკავეს. “გლობალური სუმუდის ფლოტილიის“ განცხადებით, ბორტზე მყოფ აქტივისტებს ღაზაში მცხოვრები პალესტინელებისთვის საკვები, მათ შორის ბავშვების საკვები და სამედიცინო დახმარება გადაჰქონდათ.