თბილისში საქართველოს დიპლომატთა საზოგადოება დაფუძნდა. დამფუძნებლების ცნობით, დიპლომატთა საზოგადოება სხვადასხვა თაობის კარიერულ დიპლომატებს აერთიანებს, კერძოდ კი, მათ, ვინც კონსტიტუციის 78-ე მუხლისა და დემოკრატიული ღირებულებებისადმი ერთგულების გამო, გადადგნენ დაკავებული თანამდებობებიდან, ან უსამართლოდ გათავისუფლდნენ დიპლომატიური სამსახურიდან.

„საზოგადოება მიზნად ისახავს პროფესიული გამოცდილებისა და დაგროვილი ინსტიტუციური მეხსიერების საფუძველზე საგარეო პოლიტიკური მოვლენების ანალიზს და ფართო საზოგადოების ინფორმირებას. ამავდროულად, DGS-ის ერთ-ერთ პრიორიტეტს საქართველოს კონსტიტუციით განსაზღვრული საგარეო-პოლიტიკური კურსის დისკრედიტაციისა და საზოგადოებაში არსებული ეროვნული კონსენსუსის რღვევისკენ მიმართულ დეზინფორმაციასა და პროპაგანდაზე რეაგირება წარმოადგენს. საზოგადოების წევრებს მტკიცედ სწამთ, რომ ევროპული და ევროატლანტიკური ინტეგრაცია წარმოადგენს საქართველოს სუვერენიტეტის განმტკიცების, ტერიტორიული მთლიანობის დაცვის, დემოკრატიული განვითარებისა და კეთილდღეობის საფუძველს. საზოგადოება მოქმედებს სამოქალაქო პასუხისმგებლობით და ხელმძღვანელობს ეროვნულ ინტერესებსა და საერთო პროფესიულ ღირებულებებზე დაფუძნებული ხედვით. საზოგადოება ღიაა ყველა დიპლომატისთვის, რომელიც იზიარებს ორგანიზაციის მისიის სულისკვეთებას, ხედვას და ფასეულობებს“, - აღნიშნულია ინფორმაციაში.