ომის დასრულების შესახებ წინადადებაზე აშშ-ის პასუხს განვიხილავთ, - ამის შესახებ ირანის საგარეო საქმეთა სამინისტროს პრესსპიკერმა, ესმაილ ბაგაიმ განაცხადა.

„ჩვენ აშშ-ის მოსაზრებები მივიღეთ და ახლა მათ განვიხილავთ“, - განაცხადა ირანის საგარეო საქმეთა სამინისტროს პრესსპიკერმა.

ბაგაის ცნობით, ვაშინგტონმა პასუხი დააბრუნა თეირანის წინადადებაზე, რომელიც პაკისტანმა აშშ-ს მიმდინარე კვირის დასაწყისში გადასცა.

ირანის წინადადება აშშ-ის მიერ დაწესებული სანქციების მოხსნას, გაყინული აქტივების განბლოკვასა და საზღვაო ბლოკადის დასრულებას ითვალისწინებს.

ამასთან, აშშ-ის პრეზიდენტმა, დონალდ ტრამპმა ჟურნალისტებს განუცხადა, რომ მზად არის ირანის წინააღმდეგ დარტყმები განაახლოს, თუმცა შეიძლება, ირანის პასუხს რამდენიმე დღეც დაელოდოს.

„დამიჯერეთ, თუ სწორ პასუხებს არ მივიღებთ, მაშინ ეს ძალიან სწრაფად მოხდება. ჩვენ მზად ვართ მოქმედებისთვის“, - აღნიშნა ტრამპმა.

კითხვაზე, თუ რამდენ ხანს დაელოდება ირანის პასუხს, ტრამპმა უპასუხა, რომ „რამდენიმე დღე, მაგრამ ეს შეიძლება ძალიან სწრაფად მოხდეს“.