საქართველოს ადვოკატთა ასოციაციის თავმჯდომარის ირაკლი ყანდაშვილის ინიციატივით, ასოციაციამ ახალი საინფორმაციო-საგანმანათლებლო კამპანია-„როგორ გავხდე ადვოკატი?“ დაიწყო. ამის შესახებ ინფორმაციას ადვოკატთა ასოციაცია ავრცელებს.

როგორც გავრცელებულ ინფორმაციაშია ნათქვამი, კამპანიის მიზანია მომავალი იურისტებისა და სამართლის სფეროთი დაინტერესებული სტუდენტებისთვის ადვოკატის პროფესიის მნიშვნელობის, მისი საზოგადოებრივი როლისა და მართლმსაჯულების სისტემაში ადვოკატის ფუნქციის გაცნობა.

„ინიციატივის ფარგლებში საქართველოს ადვოკატთა ასოციაციის თავმჯდომარე სხვადასხვა უმაღლეს საგანმანათლებლო დაწესებულებაში საჯარო ლექციებს მართავს. შეხვედრები უკვე გაიმართა ივანე ჯავახიშვილის სახელობის თბილისის სახელმწიფო უნივერსიტეტში, საქართველოს ეროვნულ უნივერსიტეტსა (SEU) და კავკასიის საერთაშორისო უნივერსიტეტში.

ლექციების ფარგლებში სტუდენტები ეცნობიან ადვოკატის პროფესიის სპეციფიკას, პროფესიული ეთიკის მნიშვნელობას, ადვოკატთა ასოციაციის როლსა და იმ პასუხისმგებლობას, რომელიც თითოეულ ადვოკატს სამართლებრივი სახელმწიფოსა და სანდო მართლმსაჯულების სისტემის განვითარების პროცესში აკისრია.

შეხვედრებისას განსაკუთრებული ყურადღება ეთმობა ასევე იმ სამართლებრივ და პროფესიულ სტანდარტებს, რომლებსაც ქართული კანონმდებლობა ადვოკატის პროფესიაში შესვლისთვის განსაზღვრავს. მონაწილეები დეტალურ ინფორმაციას იღებენ საქართველოს ადვოკატთა ასოციაციაში გაწევრიანების ეტაპებისა და პროფესიული განვითარების შესაძლებლობების შესახებ.

საქართველოს ადვოკატთა ასოციაცია აღნიშნული კამპანიის ფარგლებში სტუდენტებთან და ახალგაზრდა იურისტებთან აქტიურ კომუნიკაციას მომავალშიც გააგრძელებს“, - ნათქვამია ინფორმაციაში.