სპეციალიზებულ მაუწყებლებს, რომელთაც პოლიტიკური და საინფორმაციო პროგრამები არა აქვს, უცხოური დაფინანსების მიღების შესაძლებლობა ექნებათ - იმავდროულად, გასათვალისწინებელია, რომ არსებობს „გრანტების შესახებ“ კანონი და დაფინანსება, რომლის მიზანი საზოგადოებაზე ზეგავლენის მოხდენაა, მთავრობასთან უნდა შეთანხმდეს, - ეს განმარტება პარლამენტის დარგობრივი ეკონომიკის კომიტეტის სხდომაზე იურიდიულ საკითხთა კომიტეტის თავმჯდომარემ არჩილ გორდულაძემ, „მაუწყებლობის შესახებ“ კანონში დაგეგმილ ცვლილებებთან დაკავშირებით გააკეთა.

აქვე გორდულაძემ აღნიშნა, რომ თუ მთავრობა ჩათვლის, რომ უცხოურ დაფინანსებას სახელმწიფოს ინტერესზე გავლენა არა აქვს, ის ასეთ დაფინანსებაზე თანხმობას გასცემს. მისი თქმით, სპეციალიზებული მაუწყებლები, რომლებსაც არ აქვთ საინფორმაციო ბადე, ნაკლებ ზეგავლენას ახდენენ საზოგადოებრივ აზრზე.

გორდულაძემ მაუწყებლებისთვის უცხოური დაფინანსების მიღების აკრძალვის მოტივებზე დღეს კიდევ ერთხელ ისაუბრა და განაცხადა, რომ გარედან მიღებულ თანხას ინტერესი აუცილებლად მოჰყვება და „გარე ინტერესით საზოგადოების აზრის ფორმირება არ უნდა მოხდეს“.

„მაუწყებლობის შესახებ“ კანონში დაგეგმილი ცვლილებებით, ე.წ. სპეციალიზებული მაუწყებლებისთვის უცხოური დაფინანსების მიღება აკრძალული აღარ იქნება. აკრძალვის მოხსნა არ შეეხებათ მაუწყებლებს, რომელთა ეთერში ახალი ამბები და პოლიტიკური პროგრამები გადაიცემა.

ამავე ცვლილებების მიხედვით, კომუნიკაციების კომისიას მედიამომსახურების მიმწოდებელთა დამფინანსებელი პირების გადარიცხვების შესახებ ინფორმაციის მოპოვება შეეძლება. კანონით აკრძალული დაფინანსების მიღების შემთხვევაში, თანხები სახელმწიფო ბიუჯეტში ჩაირიცხება.