უკრაინის პრეზიდენტმა ვოლოდიმირ ზელენსკიმ დაადასტურა, რომ 22 მაისის ღამეს, უკრაინის საზღვრიდან 700 კილომეტრში მდებარე რუსეთის ნავთობგადამამუშავებელი ქარხნის წინააღმდეგ საბრძოლო ოპერაციები განახორციელა.

„ვაგრძელებთ თავდაცვით ოპერაციებს აქტიური ოპერაციების განსაზღვრულ ზონებში. დღეს უკრაინის შეიარაღებული ძალების მთავარსარდალმა, ალექსანდრ სირსკიმ, წარადგინა მოხსენება რუსეთის ნავთობგადამამუშავებელი და საექსპორტო აქტივების წინააღმდეგ შორ მანძილზე მოქმედი დრონების გამოყენების შესახებ. კერძოდ, ღამით უკრაინის თავდაცვის ძალებმა ოპერაცია განახორციელეს იაროსლავის ნავთობგადამამუშავებელ ქარხანასთან დაკავშირებული სამიზნეების წინააღმდეგ - ჩვენი ტერიტორიიდან დაახლოებით 700 კილომეტრში. ჩვენ ომს შინ - რუსეთში - ვაბრუნებთ და ეს სრულიად სამართლიანია“, - აღნიშნა ზელენსკიმ.

მისივე თქმით, დარტყმები განხორციელდა უკრაინის დროებით ოკუპირებულ ტერიტორიაზე მდებარე სამიზნეებზეც.

„ასევე ვამზადებთ ჩვენი გრძელვადიანი სანქციებისა და საშუალო რადიუსის დარტყმების სხვა ფორმებს ჩვენს ქალაქებსა და თემებზე რუსეთის თავდასხმების საპასუხოდ“, - აღნიშნა ზელენსკიმ.